Porkuradór Jerál Repúblika (PJR), Jose Ximenes. Imajen Egas Cristovão

DILI, 16 janeiru 2020 (TATOLI)–Ministériu Públiku (MP) liuhusi Prokuradór Jerál Repúblika (PJR), José da Costa Ximenes, preokupa ho meiu kontrolu sasán ne’ebé tama-sai iha territóriu Timor-Leste la forte. 

“Ita-nia kontrolu ba transporte ne’ebé transporta sasán tama-sai territóriu Timor-Leste durante ne’e la forte. Tanba ne’e, aproveita informa ba Prezidente Repúblika kona-ba loron rua liubá, ekipa Ministériu Públiku nian hamutuk ho ekipa Polísia Nasionál Serbisu Investigasaun Kriminál (PNSIK) no PSIK (Polísia Sientífika Investigasaun Kriminál) husi Polísia Nasionál Timor-Leste (PNTL) hala’o serbisu hamutuk hodi trava droga tipu sabu-sabu ho kuantidade kilógrama 3,573”, PJR hato’o ba mídia hafoin hasorumalu ho Xefe Estadu, Francisco Guterres Lú Olo, iha Palásiu Prezidente Nicolau Lobato, Bairru Pité, kinta ne’e.

Nia konta tuir katak droga ne’e ninia enderesu ka destinasaun finál dehan atu mai Dili, Timor-Leste, ba timoroan ida ho naran inisiál CMB.

José hatutan bainhira droga ne’e to’o iha aeroportu, tanba haree katak enderesu ne’e tau CMB nia naran, no ekipa ne’e lori kedas hodi asegura tiha. Hein julgamentu mak foin bele haree ninia rezultadu.

“Valór husi sabu-sabu Kristál ne’ebé ita prende ho nia kustu millaun $3-resin”, nia haktuir.

Mensajen ne’ebé Prokuradór Jerál Repúblika hakarak pasa mak hanesan, Timor-Leste ninia sistema kontrolu tenke reforsa nafatin.

“Ne’e ho sentidu katak ita-nia nasaun nia sistema kontrolu ne’e fraku, tanba ne’e mak ema hakarak ultrapasa ho sasán sira-ne’e. Maski nune’e, ha’u hanoin Timor la’ós destinasaun finál, maibé ema uza hanesan fatin tránzitu atu bele kontinua ba nasaun seluk. Pior liu ita bele analiza ba futuru maka, karik aban bainrua konsege kria merkadu iha Timor, loke oportunidade ba joven timoroan sira no ita-nia nasaun sei sai estragu liután”, nia alerta.

José da Costa hakarak informa mós katak ne’e la’ós papél Ministériu Públiku mesak no PNTL, maibé papél timoroan hotu nian.

“Ita-nia maluk timoroan sira-nia problema ida maka, dalaruma hakarak atu simu osan barak, maibé lakohi atu halo serbisu. Entaun, fásil hanesan ne’e, tanba informasaun ne’ebé ami iha, la’ós primeiravez maibé dala rua ona no primeiru ne’e ultrapasa husi Timor Travel. Ne’e atu dehan katak kontrolu ba transporte ne’ebé tama sai territóriu Timor-Leste (TL) tenke forte”, nia konta tuir.

Nia kontinua fó atensaun nafatin katak presiza reforsa serbisu integradu iha Batugade, Maliana.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here