Irrigasaun ida iha postu administrativu Atsabe, munisípiu Ermera. Foto PNDS

DILI, 16 janeiru 2020 (TATOLI) – Ministru Agrikultura no Peska (MAP), Joaquim José Gusmão dos Reis Martins, informa iha proposta Orsamentu Jerál Estadu (OJE) 2020 prevee osan rihun $277 atubele hala’o manutensaun ba irrigasaun sira.

“Ita iha kanál irrigasaun ne’ebé iha atu normaliza no halo manutensaun kuaze 12 ho orsamentu ne’ebé prevee iha OJE rihun $277 husi kategoria kapitál menór,” Ministru Joaquim Gusmão ba TATOLI iha Parlamentu Nasionál, ohin.

Nune’e, nia dehan kanál irrigasaun iha 12, mas MAP foku liubá reabilita irrigasaun boot sira hanesan Waibaba, Bonuk, Karau-ulun, Bebui, Bulutu, Maliana I no Maliana II.

“Ita sei foku ba reabilita irrigasaun boot sira, depois ne’e mak ita haree fali irrigasaun ki’ikoan sira ne’e”, katak.

Joaquim Gusmão adianta durante tinan rua (hahú 2017 to’o 2018) laiha osan ba manutensaun irrigasaun hirak ne’e, tanba ne’e rezulta bee komesa halai la tuir dalan hodi sobu natar sira.

Hodi dehan atu hasa’e produsaun hare, presiza duni irrigasaun di’ak hodi fasilita agrikultór sira halo natar.

Tuir dadus MAP nian iha 2017, tempu ne’ebé difísil tebes ba iha agrikultór sira tanba enfrenta hela situasaun (El Niño), maibé agrikultór sira konsege prodús hare tonelada 36,995.87 ne’ebé rezulta foos kuaze tonelada 22,197.25 ne’ebé prodús iha rai-laran.

Daudaun ne’e, natar ektare 2,026.74 mak sei utiliza sistema tradisionál katak hare kari de’it iha natar laran, duut la hamoos, kontrolu ba adubu ladi’ak no ektare 9,062.94 mak hare kari, fokit kuda fali, maibé la kuda ho liña no kontrola ba adubu, pestisida no bee ladún di’ak. Ektare 771, implementa sistema prátika  agrikultura di’ak, katak hare kuda ho liña, kontrola ba adubu, pestisida, bee di’ak no laiha duut.

Proposta orsamentu 2020 ba MAP hamutuk millaun $17,299 ne’ebé kategoriza ba saláriu no vensimentu millaun $3,784, bens no servisu millaun $9,824, transferénsia públika rihun $214, kapitál menór rihun $694 no kapitál dezenvolvimentu millaun 2,784.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here