Ministru Agrikultura no Peska, Joaquim José Gusmão dos Reis Martins. Imajen/Egas Cristovão.

DILI, 16 janeiru 2020 (TATOLI) – Ministru Agrikultura no Peska, Joaquim José Gusmão dos Reis Martins, informa iha proposta Orsamentu Jerál Estadu (OJE) 2020, Ministériu Agrikultura no Peska (MAP) prevee rihun $161 atubele halo manutensaun ba tratór sira ne’ebé kondisaun sei di’ak uitoan.

“Manutensaun tratór ita tau orsamentu, maibé la signifika ita hadi’a tratór hotu-hotu, maibé ita konsentra ba halo manutensaun ba tratór sira ne’ebé ladún aat barak”, Ministru Joaquim Gusmão ba TATOLI iha Parlamentu Nasionál, ohin.

Nia dehan, daudaun iha tratór 400-resin, ne’ebé orsamentu ba reparasaun rutina no períodiku ba tratór kuaze 100-resin mak rihun $161.

“Ita komprende katak tratór sira ne’ebé ita iha dezde 2008 ne’ebé kuaze tinan 10-resin ona, ne’e difikulta tebes ita atubele atende ita-nia natar no to’os-na’in sira”, katak.

Hodi dehan, daudaun MAP hahú haree opsaun balun atu halo manutensaun ba tratór sira ne’e, Governu mak hadi’a rasik ka koopera ho setór privadu sira.

“Ita haree meiu hotu atubele asegura fila rai ba ita-nia natar no to’os-na’in”, afirma.

Primeiru-Ministru Taur Matan Ruak, orienta MAP atu hala’o leilaun ba tratór sira no konsege halo leilaun ba tratór 56, maibé foin mak ema sosa rua.

Aleinde ne’e, MAP mós aloka orsamentu rihun $250 atu sosa alfaia (sasán) ba tratór sira, no prevee rihun $61-resin atu hadi’a mákina pezada hanesan eskavadora rua, bulldozer ida no loader ida.

Antes ne’e, Diretór Servisu Munisipál Agrikultura (SMA) Lautem, Edmundo da Costa, dehan tratór boot hamutuk 40, maibé 28 maka aat hotu ona no 12 mak sei halo operasaun. “Tratór 40, hela de’it 12 maka sei halo operasaun, seluk ne’e ita bele dehan kondisaun aat hotu ona”, Diretór ne’e katak ba Ajénsia TATOLI iha Lospalos, foin lalais ne’e.

Hodi hateten tratór ne’e nia pesa no rolamentu kuaze aat hotu, maibé jestaun ba manutensaun ekipamentu agríkola sentraliza iha nasionál, tanba ne’e tenke halo proposta maka foin bele halo hadi’a.

“Uluk 2018, osan ba manutensaun hamutuk $2000, maibé agora hatún fali 500, ami aprezenta relatóriu de’it ba nasionál atu mai halo manutensaun, más la aprova”, lamenta.

Notísia relevante : Maioria Tratór Boot Iha Ainaro Avaria

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here