Komandante Jerál PNTL, Komisariu Faustino da Costa. Imajen /Antonio Goncalves

DILI, 16 janeiru 2020 (TATOLI)–Instituisaun Polísia Nasionál Timor-Leste (PNTL), liuhusi Komandante Jerál, Komisáriu Faustino da Costa, rekomenda ba Governu liuliu diresaun kompetente atu buka meiu oinsá bele regula komunidade ne’ebé fa’an tua sabu iha fatin-fatin.

Komisáriu Faustino rekomenda tanba tuir relatóriu PNTL nian ba krime ne’ebé akontese durante Natál no Tinan Foun, hamutuk 449, kontribui husi ema lanu hafoin konsome tua sabu.

“Kazu sira-ne’e ninia kauza primeiru maka lanu no halo asaltu ba malu. Ita hatene katak iha kintu-kantu Dili nian, ema sempre hakerek, ‘iha ne’e fa’an tua sabu’. Sira-ne’e maka kontribui hotu ba krime, tanba ema asesu livre loos, ho folin ne’ebé baratu, depois kontribui ba joven sira atubele baku malu no asalta malu”, Faustino ko’alia ba jornalista sira, hafoin enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Nia subliña katak iha prinsípiu la’ós kompeténsia PNTL maka atu bandu ka regula, maibé PNTL rekomenda ba Governu liuliu diresaun ne’ebé halo serbisu ba ida-ne’e, atubele tau-matan ba kestaun refere.

“Bainhira ita husik fa’an iha fatin-fatin, krime kontinua akontese tanba realidade ita haree katak ema sira ne’ebé halo krime ne’e primeiru tanba lanu”, nia haktuir.

Maski ho akontesimentu sira, maibé Faustino informa katak Prezidente Repúblika apresia tebes ho serbisu Polísia Nasionál Timor-Leste (PNTL) no mós FALINTIL-Forsa Defeza Timor-Leste, ne’ebé asegura loron-boot Natál no Tinan Foun la’o hakmatek, ema hotu festeja ho di’ak.

Nia hatutan, Prezidente Repúblika mós husu nafatin ba PNTL atu kontinua mantein serbisu hanesan baibain, bazeia nafatin ba lei no órden.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here