Kondisaun atuál iha HNGV. Imajen: rede sosiál

DILI, 16 janeiru 2020 (TATOLI)-Diretór Administrasaun Lojístika no Finansas HNGV, Duarte Marçal de Araújo hateten, kama iha Ospitál Nasionál Guido valadares (HNGV) iha espasu limitadu maibé tratamentu hanesan.

Nia informa, loloos atuál ne’e kama iha HNGV ne’e iha kama hamutuk 275 maibé realidade ne’ebé iha kama hamutuk 342 de’it.

“Pasiente sira toba duni iha koridór maibé tratamentu ne’ebé ita halo ne’e hanesan. La’os dehan sira toba iha koridór ne’e, ami atu la haree ne’e, lae. Maibé, ami haree hanesan,” infoma Diretór Administrasaun Lojístika no Finansa HNGV, Duarte Marçal de Arauju, ba jornalista sira hodi hatan ba preokupasaun husi komunidade kona-ba pasiente balun toba iha koridór iha nia kna’ar fatin, ohin.

Tanba ne’e, nia husu ba na’in ulun sira katak kada tinan pasiente aumenta bebeik entaun husu ba Governu oinsá atu tau matan ba asuntu ida ne’e.

Ezemplu, nia dehan, hanesan uma pediátria ne’ebé mak halo andar lima no uma ida ne’e mak hahú halo iha tinan 2015 to’o agora, karik ne’e ita uza ona hodi responde fali pasiente sira to’o ema 500 no 600 mós bele hela.

Nia rekuñese, pasiente sira toba duni iha koridór ne’e los maibé pasiente barak liu no pasiente balun ne’ebé alta, ami haruka fila fali sira ne’ebé toba iha koridór ba toba fali iha kama ne’ebé mak mamuk.

Nia informa, espasu iha HNGV mak hanesan ne’e ona no sira-nia parte halo meius oinsá mós espasu mak hanesan ne’e. Se ita buka solusaun seluk mak ita tenke halo uma foun.

Maibé kondisaun ida ne’e, nia dehan, hanesan fanu na’in ulun sira para buka solusaun. Medida mak atu halo kontrusaun foun maibé liu ona tinan lima dehan atu halo konstrusaun ba andar lima maibé to’o agora seidauk realiza entaun ita tenke simu kondisaun ne’ebé mak iha.

Nia hatutan, kondisaun mak enfermaria ne’ebé mamuk ne’e sira-nia parte sempre buka kama hanesan “maka” maibé “maka” ne’e mós nia parte husu ajuda ba Falentil-Forsa Defeza Timor-Leste (F-FDTL) sira.

“Maibé kona-ba tratamentu ida ne’ebé mak hanesan balun toba iha kama no balun toba iha “maka” tratamentu hanesan,” nia haklaken.

Nia haktuir, pasiente ne’ebé mak iha sala emerjénsia enfermeiru sira atende 24 oras hamutuk 180 190 ne’e ita haree katak situasaun ne’ebé mak sa’e .

Iha fatin hanesan, Vise-Ministru Dezemvolvimentu Estratéjiku Saúde, Bonifacio Maucoli do Reis, hateten nia konfirma ona ho Diretór Jeral HNGV katak horseik pasiente ne’ebé tama emerjénsia ne’e pasiente hamutuk 75.

Nia hatutan, sala emerjénsia mós ninia kondisaun ne’ebé mak kloot no kama ne’ebé iha, pasiente sira nakonu, pasiente balun hodi toba no balun ba halo internamentu maka kama mamuk entaun kama mamuk ne’e fasilita fali pasiente seluk.

“Ita mós iha ona planu ba HNGV ne’ebé agora master plan la’o hela. Ne’ebé, iha tinan 2020 Orsamentu Jerál Estadu banhira aprova ona no master plan la’o no tinan 2020 ne’e ita halo kontrusaun ba Hospitál Nasionál Guido Valadares,” informa Vise Ministru Dezemvolvimentu Estratejiku Saúde, Bonifacio Maucoli do Reis, ba jornalista sira iha Parlamentu Nasionál, ohin.

Maibé, nia dehan, iha 2020 Orsamentu Jerál Estadu banhira la’o ona mak master plan komesa fó sai para ema mai konkore para mai halo master plan no prontu ona para avansa hodi bele halo konstrusaun.

“Maibé ne’e depende ba Parlamentu Nasionál no mós Governu nia apoia atu aloka orsamentu para hodi bele aselera konstrusaun foun ba HNGV ne’e,” nia esplika.

Jornalista : Felicidade Ximenes

Editór        : Rafy Belo

HAKEREK NO HATÁN

Please enter your comment!
Please enter your name here