Primeiru-Ministru, Taur Matan Ruak. Imajen Tatoli/Egas Cristóvão

DILI, 16 janeiru 2020 (TATOLI)–Primeiru-Ministru, Taur Matan Ruak hateten Governu halo ezersísiu maka’as loos harii ona Komisaun Reforma ida atu haree oinsá bele aumenta reseita iha 2020.

“Reseita no despeza reforma fiskál ne’e to’o iha ne’ebé. Agora halo esforsu maka’as hela oinsá atu halo reforma ida-ne’e para ita bele aumenta reseita. Uluk ita iha Komisaun Reforma ida. Sira-nia serbisu halo preparativu no bainhira ramata transfere ba Ministériu Finansa hodi haree,” Taur dehan iha debate jeneralidade Orsamentu Jerál Estadu (OJE) 2020 iha Parlamentu Nasionál, kinta ne’e.

Nia hatutan daudaun ne’e Governu mós hala’o hela ezersísiu boot ida nune’e bele kria kondisaun administrativa no téknika atubele aumenta reseita uitoan-uitoan tanba Governu rekoñese to’o oras ne’e seidauk iha esforsu para bele kobra reseita hotu ne’ebé iha.

“Kona-ba reforma fiskál ne’e naturalmente Parlamentu Nasionál ne’e atribui ida-ne’ebé atu toma desizaun. Ha’u hein katak debate orsamentu ida-ne’e ramata, Ministériu Finansa kanaliza lei sira ne’ebé prepara ona para halo tiha aprovasaun hodi ajuda Governu hodi rekolla taxa,” Taur esplika.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here