Primeiru-Ministru, Taur Matan Ruak. Imajen/TATOLI Egas Cristovao

DILI, 16 janeiru 2020 (TATOLI)–Primeiru-Ministru (PM), Taur Matan Ruak hateten Governu halo esforsu maka’as iha Orsamentu Jerál Estadu (OJE) ne’ebé aprezenta iha tinan kotuk maibé Parlamentu Nasionál husu redusaun. Maski nune’e, Governu haree no tetu ona atu aloka orsamentu ho loloos ba instituisaun públika hotu ho di’ak.

“Orsamentu ida aprezenta agora ne’e iha tinan kotuk ita tenke redús tiha. Entaun, ita iha rekursu finanseiru ne’ebé iha, tan ne’e ita halo esforsu ida para bele fahe no aloka ba instituisaun sira ho loloos. Ita iha instituisaun órgaun serbisu públiku hamutuk 86, programa 13 no sub programa 482 ne’ebé tau iha livru 2 no atividade 1957,” Taur hato’o iha debate OJE 2020 faze jeneridade iha Parlamentu Nasionál, kinta ne’e.

Nia hatutan, programa no sub programa hirak-ne’e fahe ba setór haat hanesan setór sosiál, infraestrutura, setór ekonómiku no dezenvolvimentu institusionál.

“Setór sosiál iha programa 29, sub programa 196, atividade 672. Setór ekonómiku nia programa 23, sub programa 72, atividade 236. Setór infraestrutura nia programa hamutuk 44, sub programa 87, atividade 763. Setór dezenvolvimentu institusional iha programa hamutuk 41, sub programa 128 no atividade 226,” PM Taur subliña.

Nia hatutan, iha faze sira-ne’e hotu Governu halo esforsu boot ida atu fahe osan ba área sira ne’ebé temi ona.

“Klaru, ne’e preokupasaun ita hotu nian. Bele ka lae ita aumenta osan iha área sira importante hanesan saúde, edukasaun, agrikultura, bee-moos no saneamentu. Ida-ne’e klaru ita hakarak maibé depende mós ba ita-nia rekursu. Buat ida ita hakarak no buat seluk ida ita bele ka lae. Entaun, ita tenke halo ezersísiu boot ida para ita bele neineik ba neineik ita kanaliza ita-nia rekursu sira-ne’e ba iha área sira importante hanesan infraestrutura estrada, portu no aeroportu sira ne’ebé nia nível dezenvolvimentu di’ak no nia nesesidade ne’e tun,” nia subliña.

Nia haklaken, hanesan preokupasaun ne’ebé Parlamentu Nasionál foti forte tebes oinsá mak Governu iha klaran atu hetan rekursu hodi fahe.

“Maibé, orsamentu foin lalais liubá ne’e edukasaun hetan maka’as. Maibé, orsamentu edukasaun mós tenke hetan ko’a. Hotu-hotu hetan ko’a fó kontribuisaun uitoan-uitoan,” Taur argumenta.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here