Diskusaun proposta OJE 2020 iha plenária Parlamentu Nasionál, kinta (16/01/2020). Imajen Tatoli/ Egas Cristóvão

DILI, 16 janeiru 2020 (TATOLI)—Deputadu Bankada Parlamentár FRETILIN, Fabião de Oliveira, kestiona programa VIII Governu nian kona-ba progresu polítika reforma fiskál.

Deputadu Bankada Opozisaun ne’e hateten, despeza orsamentu 2020 ho montante biliaun $1,668 ne’e signifika dependénsia forte ba fundu mina-rai.

“Ha’u iha pergunta ida, polítika reforma fiskál VIII Governu nian to’o iha ne’ebé ona”, deputadu ne’e husu progresu polítika reforma fiskál ne’e liuhosi debate jeneralidade OJE 2020 loron daruak, iha plenária Parlamentu Nasionál (PN), kinta ne’e.

Lee resposta: Governu Halo Ezersísiu ba Polítika Reforma Fiskál

Tuir informasaun ne’ebé Deputadu FRETILIN ne’e asesu, hatudu seidauk iha legalidade ba kobre reseita.

“Ha’u husu ba Primeiru-Ministru, rekrutamentu ba asesór sira kada ministériu halo saida. Ne’e katak ita gasta osan Estadu nian de’it. La prodús reseita ruma ba Estadu ida-ne’e. Dependénsia nafatin ba fundu mina-rai”, nia subliña.

Nia afirma, ko’alia kona-ba kreximentu iha rai-laran ninia rezultadu mak falta investimentu, kreximentu tun tanba produtividade tun.

Fabião husu polítika saida mak Governu opta hodi hasa’e produtividade liuhosi mão de obra nune’e bele atinje kreximentu ekonómiku.

Tuir nia katak Timor-Leste nia ekonomia dependénsia ba sasán importasaun. Ne’e indika katak Timor-Leste nia empreza sira la utiliza oportunidade. Tanba ne’e, polítika VIII Governu nian saida mak bele eleva setór privadu sira.

Deputadu Bankada Opozisaun ne’e dehan fundu mina-rai ne’e Maromak mak fó hela. Tan ne’e, bainhira gasta naran-naran de’it, rai ida-ne’e sei fó malisan. Presiza hanoin didi’ak ba ida-ne’e.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here