Diskusaun proposta OJE 2020 iha plenária Parlamentu Nasionál, kinta (16/01/2020). Imajen Tatoli/ Egas Cristóvão

DILI, 16 janeiru 2020 (TATOLI)—Reprezentante povu iha Uma Fukun Parlamentu Nasionál, husu Governu tenke halo balansa entre despeza no reseita iha Orsamentu Jerál Estadu (OJE) 2020.

Deputadu Bankada Parlamentár FRETILIN, Fabião de Oliveira, hateten despeza no reseita tenke balansu, nune’e sustentabilidade fundu mina-rai labele iha risku.

“Ha’u hanoin despeza ho reseita tenke iha balansu tanba sustentabilidade fundu mina-rai ne’e ita tenke hanoin didi’ak. Ha’u husu orsamentu ida-ne’e uza ho dalan loloos, ezekusaun mós tenke ho kualidade. Signifika katak gasta osan loos tuir dalan loloos”, Deputadu Bankada FRETILIN ne’e dehan liuhosi debate jeneralidade OJE 2020 loron daruak, iha plenária Parlamentu Nasionál (PN), kinta ne’e.

Nia husu VIII Governu atu uza despeza 2020 ho montante biliaun $1,688 tenke pro povu nune’e bele kore povu hosi ki’ak no mukit.

Lee resposta:  Governu Halo Ezersísiu ba Polítika Reforma Fiskál 

Deputadu Bankada Opozisaun ne’e afirma, nesesidade bázika sira sei iha problema boot hanesan bee-moos, saúde, edukasaun no infraestrutura bázika.

Nia fó ezemplu, atendentimentu iha Hospital Nacional Guido Valadares (HNGV) ladi’ak tanba pasiente balun toba de’it iha rai.

“Ne’e hatudu katak ita-nia nesesidade báziku ne’ebé liuhosi Orsamentu Jerál Estadu laiha kualidade ba ezekusaun”, nia argumenta.

Tuir livru orsamentál, Orsamentu Jerál Estadu ba tinan 2020 hamutuk biliaun $1.668,0 (esklui millaun $173,5 hosi kompromisu parseiru dezenvolvimentu). Totál Orsamentu Jerál Estadu 2020 boot liu ho montante %12.6 kompara tinan 2019. Ida-ne’e tanba Governu planu atu komesa habelar investimentu kapitál sosiál no programa dezenvolvimentu ekonomia iha 2020.

Nune’e mós kapital sosiál, konetividade nasionál no dezenvolvimentu ekonomia maka prioridade iha orsamentu jerál 2020. Totál %28.4 husi proposta Orsamentu Jerál Estadu 2020 sei aloka ba ministériu no ajénsia sira iha setór kapitál sosiál. Husi totál ida-ne’e, %9,5 aloka ba setór edukasaun, %13 ba protesaun sosiál no %7,3 ba saúde. Governu sei introdús programa hodi hasa’e empregu no auto‐sufisiénsia ba sidadaun Timor‐Leste.

Reseita Doméstika

Tuir livru orsamentál, hafoin kolesaun reseita doméstika estagnadu iha tinan 2017 no 2018, prevee katak reseita doméstika sei kontinua sa’e ba millaun $210,5 iha 2020.

Tendénsia pozitiva ida-ne’e tanba sei iha dezempeñu makro ekonómiku ne’ebe di’ak nu’udar rezultadu husi aumentu iha investimentu setór privadu, kontinuasaun investimentu iha projetu infraestrutura no introdusaun progama foun ka instrumentu fiskál foun.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here