Primeiru-Ministru aprezenta proposta Orsamentu Jerál Estadu 2020 iha Parlamentu Nasionál. Imajen Tatoli/ Egas Cristóvão.

DILI, 16 janeiru 2020 (TATOLI)—Vise Prezidente Bankada Congresso Nacional da Reconstrução de Timor (CNRT), Patrocino Fernandes hateten nia laiha konfiansa ba membru Governu tanba laiha responsabilidade Estadu.

“Ha’u laiha konfiansa ba Governu ida-ne’e. Ha’u ko’alia nune’e tanba Governu ida-ne’e ministru joven barak maibé feriadu barak liu. Sentidu Estadu no Sentida responsabilidade laiha liu. Loos. Lei fó dalan atu féria maibé iha momentu importante sira hanesan destinu nasaun nian ita tenke sakrifika hodi serbí Estadu ida-ne’e,” deputadu ne’e deklara iha debate proposta Orsamentu Jerál Estadu (OJE) 2020 iha Parlamentu Nasionál, kinta ne’e, relasiona ho membru Goveru balun la marka prezensa iha audiénsia ba Orsamentu Jerál Estadu (OJE) 2020 iha nível Komisaun Parlamentu.

Nia dehan, audiénsia ne’e importante ba ministru sira-nia programa maibé ministru la marka prezensa.

“Ida-ne’e problema ida-ne’ebé ladi’ak. Ha’u sente ladi’ak duni! Ministru sira féria ne’e mesak joven de’it,” Patrocino informa.

Nia subliña, iha administrasaun públika liu-liu liña ministeriál la’o sabraut tanba kuaze tinan rua ona kargu xefia sira fulan tolu-tolu mak simu despaisu estensaun interinu. Ida-ne’e hatudu la motiva ema atu serbisu ho di’ak.

“Ministru barak laiha kbi’it atu hola desizaun ba serbisu nasaun nian. Krítika sira-ne’e atu halo avaliasaun di’ak duni ba membru Governu sira tanba serbisu barak la’o la loos. Eletrisidade kontinua mate-lakan. Ita hanoin osan laiha maibé osan mai iha Parlamentu tau atu selu mina ho osan ne’ebé bo’ot. Problema ne’e iha ne’ebé?,” nia preokupa.

Iha parte seluk, Patrocino akresenta, programa VIII Governu nian hatuur mós desentralizasaun administrativa maibé ohin loron Ministériu Administrasaun Estatal (MAE) seidauk iha polítika atu reforsa programa ida-ne’e.

“Ha’u akompaña Primeiru-Ministru ko’alia iha mídia balun katak iha 2020 sei hakle’an liután kona-ba desentralizasaun administrativa maibé to’o ohin loron ita la hetan inisiativa ruma hodi reforsa meiu ida-ne’e mai hosi Ministériu Administrasaun Estatal atu hanoin kondisaun oinsá para atende no aselera polítika ida-ne’e rasik,” nia esklarese.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here