Xefe Kaza Sivíl Prezidénsia Repúblika, Francisco Maria de Vasconcelos, akompaña husi Diretora Ajénsia Konservasaun Internasionál Timor-Leste, Trudiann Dale, ko'alia ba mídia hafoin asina nota entendimentu. Imajen TATOLI/Cipriano Colo

DILI, 16 janeiru 2020 (TATOLI)–Conservation International, fó apoiu ba programa Kampaña Nasionál kona-ba kuda ai-oan: “Sidadaun Ida, Ai-oan Ida”, ne’ebé Prezidente Repúblika, Francisco Guterres Lú Olo lansa iha fulan-janeiru 2019.

Apoiu ne’e Conservation International formaliza liuhusi asina Memorandu Entendimentu ho Prezidénsia Repúblika, ne’ebé reprezenta husi Xefe Kaza Sivíl, Francisco Maria de Vasconcelos no Diretora Conservation International Timor-Leste, Trudiann Dale.

Diretora Conservation International Timor-Leste hato’o ninia sentidu agradesimentu tanba Prezidénsia Repúblika hili ninian organizasaun atu koopera hodi tau-matan ba ambiente ne’ebé sai prioridade ba nasaun hanesan degradasaun rai, ai-horis barak, bee iha rai okos, rai bokur ne’ebé lakon husi tinan ba tinan iha Timor-Leste.

“Conservation International orgullu tebes ho kooperasaun ne’e tanba vizaun kuda ai-oan millaun ida no tau-matan ba mudansa klimátika hatudu Prezidente Repúbilka nu’udár ema vizionáriu ida. Nasaun barak iha mundu seidauk haree impaktu mudansa klimátika”, Trudiann Dale hateten ba mídia hafoin asina memorandu, iha Palásiu Prezidente Nicolau Lobato, Bairru Pité, Dili, ohin.

Diretora ne’e hatutan, Memorandu Intendimentu ne’e, Conservation International sei fó apoiu tékniku ba Kampaña Nasionál “Sidadaun Ida, Ai-Oan Ida” atu kuda ai-oan tokon ida iha Timor-Leste tomak.

“Apoiu tékniku ne’ebé Conservation International sei kontribui ba kampaña ne’e mak: hasa’e kapasidade tékniku komunidade, monitorizasaun no avaliasaun, mapeamentu ba área atu kuda, identifika no dezenvolve oportunidade atu hetan finansiamentu ba programa”, nia subliña.

Conservation International nu’udár organizasaun globál ne’ebé hala’o nia serbisu iha nasaun 40 no hahú serbisu iha Timor-Leste dezde tinan-2009.

Iha Timor-Leste, Conservation International foka nia serbisu iha kriasaun rede área protejida, apoiu komunidade, konservasaun tasi no turizmu ho baze komunitária.

Nune’e mós, Xefe Kaza Sivíl Prezidénsia Repúblika, Francisco Maria de Vasconcelos espresa sentimentu ksolok ho Conservation International ne’ebé serbisu hamutuk ho Prezidénsia Repúblika tanba meiu ambiente nu’udár asuntu globál no asuntu ema hotu nian ne’ebé liga ho ema no biodiversidade nia moris.

“Ohin ami asina nota entendimentu ho ajénsia Conservation International oinsá haree no promove atu halo advokasia ba meiu ambiente iha Timor-Leste nune’e ita konserva no kuda ai-oan liuhusi esforsu hotu. Prezidénsia Repúblika mós koopera ho entidade hotu nune’e bele konserva rai ne’e di’ak liután ba jerasaun sira tuir mai”, nia hateten.

Prezidente Repúblika, Francisco Guterres Lú Olo, iha janeiru 2019, lansa Kampaña Nasionál “Sidadaun Ida, Ai-oan Ida” ne’ebé envolve entidade hotu-hotu kuda ai-horis milaun ida durante mandatu nu’udár parte husi kontribuisaun sidadaun ida-idak ba meiu ambiente no dezenvolvimentu sustentável.

Jornalista: Cipriano Colo

Editór: Xisto Freitas

1 KOMENTÁRIU

  1. objetivu nebe halo hamutuk CI no Guverno ne kapas tebes e lalika para iha dalan klaran. Atu konserva ambiente ho diak ida ne sei ajuda povo nia moris tamba agora mudansa klimatika bele fo impakti att nebe bele afeita ba buat hotu hotu ba moris nee tantu ba ita ema, animal no rai nee.

HAKEREK NO HATÁN

Please enter your comment!
Please enter your name here