Diretór Jerál Autoridade Aduaneira (AA), José António Fátima Abílio. Imajen António Gonçalves

DILI, 16 janeiru 2020 (TATOLI) – Diretór Jerál Autoridade Aduaneira (AA/Alfándega), José Antonio Fátima Abílio, hatete iha tinan ne’e, Alfándega hahú dezenvolve janela únika ne’ebé sei konsentra uluk ba nasionál.

Tanba implementasaun sistema Automated System for Custom Data (ASYCUDA) World ramata ona no iha 2020 ne’e hahú tama ba janela únika.

“Dezenvolve ne’e fahe iha parte rua, primeiru, hakarak konsentra uluk lai ba nasionál, segundu, maka ami foin halo estensaun ba nasaun rejionál sira (Indonézia no nasaun membru CPLP), maibé ida ne’e sei liuhusi prosesu ida tanba sei halo aproximasaun no iha diskusaun téknika no iha kritéria legál balu ne’ebé tenke prienxe nivel nasionál no internasionál”, Diretór Jerál ba TATOLI iha Parlamentu Nasionál, ohin.

José António dehan projetu ida ne’ebé ambisiozu tebes, maibé tenke inisia para bele fasilita negósiu tanba Timór nasaun ida ne’ebé ki’ik no difísil ema atu mai asesu, entaun liuhusi meiu sira ne’e bele ajuda informasaun lalais.

Tanba ne’e, informasaun hotu relasiona ho komérsiu nian, dokumentu tranzasaun tenke tama liuhusi sistema ASYCUDA World ne’ebé maka uza hanesan plataforma hodi implementa janela únika.

“Janela únika ne’e atu fasilita informasaun dadus sira, ezemplu, ha’u hakarak dadus importasaun hosi Indonézia ou rai seluk ha’u la presiza husu ba sira, entaun liuhusi sistema ne’e bele halo konesaun ho sistema nasaun seluk nian para troka informasaun sira relasiona ho asuntu sira ne’e”, Diretór Jerál afirma.

Hodi dehan hanaran janela únika tanba dokumentu sira ne’e tama mai Timor-Leste liuhusi sistema ASYCUDA World.

Autoridade másima AA ne’e esplika, janela únika refere la uza sistema seluk, maibé nafatin utiliza sistema ASYCUDA World. Tanba ne’e maka iha rezolusaun Governu 20/2017, Konsellu Ministru aprova sistema ne’e hanesan plataforma ida ba implementasaun janela únika eletrónika iha Timor-Leste.

“Kona-ba janela únika ita hanoin ida ne’e sistema foun ida más lae, sistema mak ASYCUDA nafatin só ke uza ida ne’e lori fasilita prosesu troka informasaun sira ho administrasaun Autoridade Aduaneira sira hosi nasaun sira seluk”, salienta.

Sobre implementasaun ASYCUDA World durante ne’e, José Antonio, rekoñese iha progresu no ajuda tebes serbisu no simplifika prosesu barak kona-ba dezalfándegamentu nian no ajuda halo verifikasaun informasaun komérsiu nian.

Sistema informátika ne’e instala ona iha postu integradu sira ho objetivu atu fasilita importadór no esportadór hodi bele la’o tuir sistema no prosedimentu ASYCUDA World.

“Vantajen hosi sistema ne’e maka ami tenta simplifika informasaun barak, prosedimentu barak no ajuda ita halo kontrolu ba koleta reseita, halo kontrolu ba merkadoria sira no iha ne’ebá sistema mós bele alerta ona bainhira ita halo la tuir regra, tanba sistema ne’e rasik ami konfigura tiha ona ho kódigu Aduaneiru”.

Nia hatutan, tuir kódigu aduaneiru ne’e katak sasán sira ne’ebé tama depois loron 30 na’in la bá prosesa nia merkadoria maka afavór ba Estadu. Iha kódigu ne’e mós kuandu liu ona loron 30 maka aplika ona demurrage (sobrestadia), ne’ebé antes loron 30 sistema ne’e alerta kedas ona ba importadór sira, ne’ebé tenke prosesa ona no bainhira lae maka aplika penalidade ou sasán afavór ba Estadu.

“Situasaun sira ne’e akontese iha fronteira sira tanba sira mós iha ligasaun hotu ona ba sistema”, dehan.

Diretór Jerál salienta kona-ba AA prosesa ona empreza hira, daudaun seidauk bele fó sai tanba presiza konfirma fali ho dadus. “Maibé atu dehan katak ami iha prosesu ba kompañia sira ne’ebé maka sira-nia sasán iha ami no liu ona loron 30 no sira mai fali ami dehan katak sasán iha no dokumentu iha, maibé tenke selu lai penalidade depois selu taxa, situasaun sira ne’e dala barak akontese iha portu Dili liga ho kontentór”, nia informa.

Relasiona ba implementasaun sistema ne’e AA rekolla reseita iha 2019 hamutuk millaun $68-resin.

ASYCUDA mak sistema ne’ebé Alfándega sira utiliza nune’e Ministériu Finansa iha papél no responsabilidade atu instala iha servisu fatin hanesan autoridade portu no aeroportu, transporte, kuarentena para iha kondisaun hodi utiliza sistema ne’e tuir rezolusaun haruka.

Servisu Alfándega iha mundu tomak uza sistema ASYCUDA ne’e, ne’ebé kompletu ho sistema informasaun ba jestaun integrada. ASYCUDA administra etapa ida-idak iha prosesu alfándega nian, husi identifikasaun sasán sira-ne’ebé konsignadu ho risku aas ba inspesaun to’o prosesu ba pagamentu sira hodi liberta no entrega sasán sira.

Sistema ne’e administra manifestu sira, operasaun tránzitu sira-nian, deklarasaun sira hotu alfándega nian, prosedimentu sira ne’ebé inserteza ka dúvida, prosedimentu sira kontabilidade nian, jestaun ba risku ASYCUDA implementa padraun internasionál hotu-hotu ba dadus komersiál nian tuir konvensaun no rekomendasaun husi órgaun sira Organizasaun Mundiál Alfándega, Organizasaun Mundiál Komérsiu, no Organizasaun Internasionál ba Padronizasaun.

Aprovasaun ba sistema ASYCUDA World ne’e iha reuniaun Konsellu-Ministru iha 25 abríl 2017, maibé antes ne’e Alfándega uza Sistema ASYCUDA ++ ne’ebé implementa dezde 2003 no iha 2013 tama ho projetu pilotu ba ASYCUDA World no hahú implementa loloos iha 2014 no konklui iha 2015.

Programa ASYCUDA kria iha United Nation Conference on Trade and Development (UNCTAD) iha tinan 30-resin liubá hodi apoia esforsu ba dezenvolvimentu nasaun sira hodi moderniza sira-nia servisu Alfándega nian no atu automatiza prosesu libertasaun iha Alfándega.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here