Primeiru-Ministru, Taur Matan Ruak, ohin, hahú debate proposta Orsamentu Jerál Estadu 2020 iha Parlamentu Nasionál. Imajen Tatoli/ Egas Cristóvão

DILI, 15 janeiru 2020 (TATOLI)—VIII Governu Konstitusionál lideradu Primeiru-Ministru, Taur Matan Ruak, prioritiza programa importante lima iha Orsamentu Jerál Estadu (OJE) 2020. 

“Prioridade Governu ba 2020 liuhosi proposta Orsamentu Jerál Estadu atu finansia programa VIII Governu Konstitusionál iha tinan fiskál 2020 iha setór lima maka define ona nu’udar prioridade prinsipál”, Primeiru-Ministru, Taur Matan Ruak, liuhusi nia intervensaun iha debate jeneralidade OJE 2020 loron dahuluk iha plenária Parlamentu Nasionál, kuarta ne’e.

Prioridade lima (5) ne’e mak hanesan Kapitál Sosiál, Dezenvolvimentu Ekonómiku, Hadi’a Konetividade Nasionál, Konsolidasaun no Hametin Seguransa no Relasaun Esterna no Konsolidasaun no Hametin Justisa, Demokrasia no Direitu Umanu.

Totál %28,4 hosi proposta orsamentu 2020 sei aloka ba ministériu no instituisaun sira iha setór Kapitál Sosiál, ho nia distribuisaun %9,5 ba edukasaun, %13 ba protesaun sosiál no %7,3 ba saúde.

Programa no medida foun sira hosi Kapitál Sosiál inklu halo uma ba veteranu, investimentu iha bee no saneamentu, konstrusaun sentru no postu saúde, konstrusaun torre tranzmisaun ba televizaun, sosa ambulánsia, konstrusaun eskola no sala aula no kontribuisaun ba seguransa sosiál.

Programa daruak mak dezenvolvimentu ekonómiku, investe iha ekonomia no finansa públika iha setór ida-ne’e maka atu fasilita investimentu setór privadu, kriasaun kampu serbisu no suporta setór agrikultura, expo Dubai, subsídiu ba grupu kooperativa no subsídiu grupu feto iha área rurál.

Programa datoluk maka hadi’a Konetividade Nasionál mak hanesan infraestrutura no lojístika, sosa ró Nakroman II no provizaun serbisu foun ba aviasaun sivíl.
Programa dahaat mak konsolidasaun no hametin defeza, seguransa, no relasaun esterna mak hanesan suporta polísia komunitária, suporta polísia fronteira, sosa ró patrollamentu hodi proteje fronteira marítima Timor‐Leste nian.

Programa dalimak mak konsolidasaun no hametin justisa, demokrasia no direitu umanu iha Timor-Leste.

“Governu nia polítika bazeia ba Planu Estratéjiku Dezenvolvimentu Nasionál (PEDN) ne’ebé implementa liuhosi Orsamentu Jerál Estadu (OJE) kada tinan. Polítika hirak-ne’e nia objetivu ba tempu naruk maka atu halo Timor‐Leste sai nasaun ho rendimentu médiu‐altu iha 2030”, Xefe Governu informa.

Primeiru-Ministru afirma, atu atinje objetivu ida-ne’e, Governu halo investimentu iha infraestrutura no setór importante sira inklui setór saúde, edukasaun no agrikultura.

Proposta anteriór ho montante biliaun $1,950 tun ba billaun $1,668. Redús millaun $228.

Hosi proposta foun ho montante biliaun $1,668 kompostu hosi Saláriu no Vensimentu millaun $235,610 (proposta anteriór millaun $241,3), Bens no Serbisu millaun $582,300 (proposta anteriór millaun $703,7), Transferénsia Públika millaun $329,706 (proposta anteriór millaun $469,8), Kapitál Menór millaun $31,548 (proposta anteriór millaun $53,2 no Kapitál Dezenvolvimentu millaun $488,837 (proposta anteriór millaun $263,1).

Nune’e mós, orsamentu atuál ba Kapitál Dezenvolvimentu ho montante millaun $488,837 (esklui empréstimu) kompostu hosi fundu infraestrutura millaun $238,3, ne’ebé destinadu ba sentru formasaun eselénsia, Autoridade RAEOA-ZEESM millaun $100,559, destinadu ba projetu oin-oin, ba konstrusaun postu saúde no klínika millaun $61 no orsamentu millaun $9,4 ba autoridade no administrasaun munisipál sira ne’ebé destinadu ba projetu oin-oin.

Totál orsamentu biliaun $1,668 ne’e mai hosi transferénsia fundu petrolíferu millaun $996,5, reseita naun-petrolífera millaun $336,8, saldu RAEOA-ZEESM millaun $126,3, doasaun millaun $7,5, empréstimu millaun $73 no saldu hosi konta tezouru millaun $254,3.

Debate loron dahuluk jeneralidade, Primeiru-Ministru, Taur Matan Ruak, akompañadu husi Ministru Estadu no Prezidénsia Konsellu Ministru, Hermenegildo Augusto Cabral Pereira, Ministru Reforma Lejizlativa no Asuntu Parlamentár, Fidelis Manuel Leite Magalhães, Ministra Finansa en Ezersísiu, Sara Lobo Brites no Ministru Negósiu Estranjeiru no Kooperasaun, Dionísio da Costa Babo Soares.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here