Administradór Postu Administrativu Dom, Aleixo Tomas Barros. Imajén/Osória Marques

DILI, 15 janeiru 2020 (TATOLI) -Ministériu Administrasaun Estatál (MAE), Prezidente Autoridade Munisípiu Dili no Komisaun Funsaun Públiku (CFP-sigla portugés), nomeia ona Tomas Barros nu’udar Administradór Postu Administrativu Dom Aleixo, Munisípiu Dili.

Nomeiasaun ne’e tama iha ein-vigor iha loron 14 outubru 2019 no Tomas Barros, efetivamente hala’o knar  administrativu iha loron 08 novembru 2019.

Ba Ajénsia TATOLI iha nia servisu fatin, Fatuhada, Dili, ohin, Tomas Barros, hateten, nia parte agradese tebes ba konfiansa husi parte relevante sira, liuliu Prezidente Autoridade Munisípiu Dili, hodi nomeia nia ba responsabilidade Postu Administrativu Dom Aleixo.

Antes ne’e, Tomas Barros asume knar nu’udar adjuntu Munisípiu Suai depois funsionáriu iha Postu Administrativu Dom Aleixo durante tinan rua no mós koordenadór Konsellu Polisiamentu Komunitária (KPK) ba Munisípiu Dili durante fulan neen.

Tomas Barros hateten, tempu badak nia sei konvoka enkontru ida ho autoridade lokál sira inklui Konsellu Polisiamentu Komunitária (KPK) atu ko’alia liu kona-ba komunidade kontinua hela iha foho lolon no mota ninin, inklui situasaun negosiante sira ne’ebé kontinua okupa dalan públiku.

“Ha’u hanoin planu ida ne’e importante ba postu Dom Aleixo hodi asegura no prevene situasaun hirak ne’e. Ha’u fiar katak iha ha’u-nia mandatu bele redús komunidade sira-nia preokupasaun no lamentasaun ba servisu administrasaun Postu Dom Aleixo nian,” Tomas Barros hateten.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here