Primeiru-Ministru, Taur Matan Ruak. Imajen: TATOLI

DILI, 15 janeiru 2020 (TATOLI)—Primeiru-Ministru (PM), Taur Matan Ruak, rekoñese to’o oras ne’e seidauk iha medida ruma hosi reseita seluk sustenta Estadu ida-ne’e.

“Kona-ba sustentabilidade fundu petrolíferu, ha’u partilla preokupasaun ida-ne’e. Se ita haree didi’ak IV Governu mai agora no tinan-tinan kuandu diskute orsamentu, simplesmente to’o agora ita seidauk iha medida ruma para bele ajuda ita diminui”, Xefe Governu ko’alia asuntu ne’e hodi responde preokupasaun Deputadu Bankada FRETILIN, Antoninho Bianco, iha debate jeneralidade OJE 2020 loron dahuluk, iha plenária Parlamentu Nasionál, kuarta ne’e.

Lee mós: Deputadu Opozisaun Husu Governu Esforsu Buka Reseita Seluk

Xefe Governu haktuir, fonte ne’ebé atu fó reseita mak fundu minarai rasik, empréstimu no dívida públika tanba lei fó dalan bele foti hosi Rendimentu Sustentável Estadu (RSE) no lei ne’e autoriza mós bele foti liu RSE.

“Ita bele haree iha emisaun títulu kona-ba partisipasaun sidadaun sira-nian, pratikamente ita seidauk hahú ida-ne’e. Naturalmente, ita tenke estuda vantajen no dezvantajen para ita rekorre fonte ida-ne’e, maibé fonte ida-ne’e dalan-ida”, Xefe Governu haklaken.

Nia fó ezemplu, empréstimu nia jurus ne’ebé hetan iha investimentu, nia jurus boot liu fali osan ne’ebé empresta foti hosi JICA no Banku Mundiál, mak Timor-Leste foti tanba jurus ki’ik.

“Ida seluk mak aumenta ita-nia reseita fiskál. Realidade hatudu ita-nia reseita fiskál agora la liu millaun $200 de’it, nein to’o para selu ita-nia saláriu no vensimentu”, nia esplika.

Xefe Governu subliña, entre fonte hirak-ne’e, fó prioridade liubá fonte ida-ne’ebé mak labele fó presaun ba fundu petrolíferu.

“Ha’u lansa iha Parlamentu Nasionál, ita muda lei fundu petrolíferu para blokeia Governu atu labele foti aas liu Rendimentu Sustentável Estimadu, se ita hakarak dalan mak ida-ne’e. Se medida ida-ne’e ita la halo, naturalmente Governu ida tama no Governu ida sai, hotu-hotu ko’alia kona-ba sustentabilidade fundu,” Xefe Governu esklarese.

Xefe Governu afirma, Governu husu orsamentu ba Parlamentu Naionál no Parlamentu Nasionál mak fó autorizasaun, tanba ne’e responsabilidade iha liu Parlamentu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here