Ministru Transporte no Komunikasaun, José Agostinho da Silva. Imajen/António Gonçalves.

DILI, 15 janeiru 2020 (TATOLI) – Ministru Transporte no Komunikasaun, José Agostinho da Silva, hateten Governu Timor-Leste, iha polítika atu halo ligasaun liña marítima ba parte Leste, Oeste no Sentrál atu fasilita populasaun viajen.

“Ita-nia konetividade ba transporte marítimu mak xave ba ita-nia dezenvolvimentu ekonómiku no ita-nia liña moris nian”, Ministru José Agostinho dehan hafoin inaugurasaun terminál urjente realokasaun ró iha Portu Dili, ohin.

Sobre polítika Governu ne’e, eis Deputadu KHUNTO ne’e dehan Governu mós hahú hanoin atu konstrui ona portu rejionál sira hanesan iha Caravela, Manatuto, Baucau, Lorehe no Com iha Munisípiu Lautem, Beaço iha Viqueque no Betano iha Manufahi no Covalima.

Atu fasilita polítika ne’e, Governu Timor-Leste no Governu Alemaña hala’o ona kooperasaun liuhusi orsamentu kontra partidária hodi konstrui ró Berlin Nakroma II.

Orsamentu ba konstrusaun ró pasajeiru Berlin Nakroma II ne’e, Governu liuhusi Ministériu Transporte no Komunikasaun prevee iha Orsamentu Jerál Estadu (OJE) 2020.

“Iha tempu badak sei halo lansamentu konstrusaun ba ró Berlin Nakroma II iha nasaun Xina,” hakotu.

Orsamentu ba konstrusaun Ró Nakroma II, Governu Timor-Leste prepara osan millaun €7,1 enkuantu hosi Governu Alemaña apoia millaun €7,8.

Ba konstrusaun ró ne’e, Governu TL no Alemaña asina kontratu ho dokumentu liuhusi Estaleiru Navál “Demen”, iha maiu 2019.

Serimónia asinatura ne’e bazeia ba kooperasaun entre Governu RDTL ho Governu Federál Alemaña.

Ró Nakroma daruak ne’e nia kumprimentu totál ho medida 67,30, largura ho medida metru 16,00, kaladu ho medida metru 3,30, altura konvés karga ho medida metru 4,80, velosidade 10 knots/13 knots, propulsaun 2X950 kw (2X1290), distánsia 1,700 millas nautikas, kapasidade karga tonelada 940, kapasidade pasajeiru 380 PAX, sosiedade klasifikadora DGL, kompozisaun klase 370 klase ekonomia, 10 ba VIP no tripulante hamutuk 16.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here