Auto Estrada iha Suai ne'ebé monu tanba udan boot, foin lalais ne'e. Imajen/Eugénio Pereira.

 DILI, 15 janeiru 2020 (TATOLI) – Ministériu Obra Públika (MOP) halo ona kontratu suplementár ho kompañia konsórsiu Xina Overseas Engineering Group Co.Ltd, no Xina Railway First Group Co.Ltd, hodi hahú reabilita auto estrada ne’ebé kotu iha Fatukai to’o Ponte Mola iha Suai, Covalima.

“Rai monu hodi estraga auto estrada ne’ebé tama responsabilidade Governu nian, ami hala’o ona kontratu suplementariu ho kompañia no sira halo hela retensaun”, Diretór Jerál MOP, Rui Hernani F. Guterres, iha edifísiu Diresaun Nasionál Peskiza ba TATOLI iha Laborátoriu, Caikoli, tersa ne’e.

Nia dehan daudaun ne’e, kompañia halo reparasaun ba auto estrada ne’ebé hetan estragu tanba dezastre naturál tanba nia orsamentu hetan ona vistu préviu husi Tribunál Kamara Kontas.

“Reparasaun responsabilidade kompañia no tama responsabilidade Governu nia mós, kompañia reabilita hela liuhusi kontratu suplementariu”, katak.

MOP mós kontinua halo kontratu suplmentariu ho empreza atu liuhusi orsamentu adisionál konstrui dalan atravesa rua atu fasilita abitante sira bá to’os, natar no vizita família nia rate iha auto estrada sorin.

“Ita mós iha orsamentu adisionál tanba momentu halo estudu ne’e la tau hanesan pasajen ka dalan atravesa ba komunidade iha área Holbelis no ida tan atu fasilita komunidade sira”, katak.

Nia dehan : “Ami tenke kria kondisaun para sira (abitante) bele atravesa, mas orsamentu aprova hotu ona ho pakote reabilitasaun auto estrada nian”, afirma.

Auto estrada ne’e, hetan estragu makaas tanba dezastre naturál kuaze metru 15,17 ne’ebé daudaun ne’e kompañia hahú halo retensaun.

Antes ne’e, Ministru Obra Públika, Salvadór Eugénio Soares dos Reis Pires, hatete auto estrada ne’ebé kotu iha Fatukai to’o Ponte Mola iha Suai, Governu mak sei toma responsabilidade hodi halo retensaun ho kustu orsamentu millaun $1-resin tanba auto estrada ne’e kotu impaktu husi dezastre naturál.

Konsellu Ministru mós aprova deliberasaun ba retensaun proposta auto estrada Suai husi Fatukai to’o Mola ne’ebé hetan estragu tanba dezastre naturál.

Proposta alterasaun ne’e aprezenta husi Ministériu Obra Públika (MOP) ba kontratu husi númeru konstrusaun auto-estrada Suai ICB/007/MPNR-2013 ne’ebé selebra ho konsórsiu Xina Overseas Engineering Group Co.Ltd, no Xina Railway First Group Co.Ltd, ne’ebé sai sesaun I Suai hahú retensaun husi Fatukai to’o mota Mola.

Auto estrada Suai inaugura iha 17/11/2018, husi Ministru Obra Públika, Salvador Eugénio Soares dos Reis Pires, ho Ministru Estadu Prezidénsia Konsellu Ministru (MEPKM), Hermenegildo Augusto Cabral Pereira “Agio Pereira”, husi Fatukai-Zumalai ho kilómetru 30.3 ho totál orsamentu hamutuk millaun $304.

Notísia relevante : Komisaun E Husu MOP Reabilita Lalais Auto Estrada Suai

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here