Vise Ministru Edukasaun Juventude no Desportu, João Zacarias. Imajen/ Tatoli Egas Cristovão

DILI, 15 janeiru 2020 (TATOLI) – Ministériu Edukasaun, Juventude no Desportu (MEJD) aprezenta ona proposta orsamentu ho montante $89,511,043,00 millaun atu aselera ninia programa esensiál lima iha 2020.

Vise-Ministru Edukasaun Juventude no Desportu, João Zacarias, hatutan programa esensiál sira ne’e ho estrutura orsamentu tuir kategoria lima mak hanesan saláriu vensimentu, bens e servisu, transferénsia públika, kapitál menór no kapitál dezenvolvimentu.

“Alokassun saláriu no vensimentu ho montante $60,607,890.00 millaun, bens e servisu $17,863,933.00 millaun, transferénsia públika $1,775,420.00 millaun, kapitál menór $3, 235,900.00 millaun no kapitál dezenvolvimentu $6,028,000.00 millaun,” João Zacarias dehan ba Agênsia TATOLI iha Parlamentu Nasionál, ohin.

Nia hatutan, husi orsamentu saláriu vensimentu ho totál $60,607,790.00 ne’e, MEJD sei halo pagamentu ba funsionáriu rihun 592 husi nasionál to’o munisípiu inklui profesór rihun $15,364.

Polítika MEJD nian, nia hatutan, atu kontinua hadi’a edukasaun ho kualidade ba timoroan tomak maibé kualidade edukasaun determina mós husi elementu importante barak mak hanesan infrastrutura no fasilidade ne’ebé adekuadu.

Polítika seluk, tuir nia, presiza hadi’a kurríkulu ensinu, kualidade manorin ho kompoténsia ne’ebé di’ak inklui koñesimentu pedagóziku apropriadu, disponiblidade ho rekursu didátiku hanesan livru sira.

“Atu atinji mehi ne’ebé boot presiza halo mós polítika planeamentu, monitorizasaun no avaliasaun ne’ebé forte no efetivu hodi garante atinjimentu objetivu husi prioridade sira ne’e,” nia esplika.

Notísia relevante:2020, MEJD Sei Identifika Kualidade Profesór Iha TL

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here