Xefe Estadu FALINTIL-Forsa Defeza Timor-Leste (F-FDTL), Maiór Jenerál Lere Anan Timur, ba jornalista sira iha Palásiu Prezidensiál Nicolau Lobato Bairru Pité, kuarta, (27/2/2019). Imajen António Gonçalves

DILI, 15 janeiru 2020 (TATOLI)–Bainhira mandatu ramata, Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, sei envolve iha vida polítika atu kontinua kontribui ba nasaun tuir luta nia prinsípiu. 

“Bainhira reforma, ha’u sei kontinua serbisu ba ha’u-nia nasaun tuir ha’u-nia devér sidadaun nian. Automatikamente bainhira ramata vida militár sei ba fali vida polítika atu serbí nasaun, tanba ha’u-nia saúde mós sei di’ak hela”, Lere hateten lia hirak-ne’e, hafoin enkontru regulár ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Tuir Lere katak tenke kontinua ho vida polítika tanba ida-ne’e nu’udár kompromisu durante funu iha ai-laran, katak bainhira ukun an no saúde sei di’ak, tenke serbí rai no povu.

“Ita-nia knaar ramata iha mundu ne’e bainhira ita mate ona”, nia deklara tan.

Líder másimu Forsa Armada ne’e subliña katak nia sei kontinua hala’o knaar nu’udár Xefe Estadu Maiór F-FDTL nian to’o ramata, no oras ne’e Lere rasik sei preokupa ho serbisu ida-ne’e.

“Tuir lei no tanba buat hotu desizaun polítika, ha’u labele dehan katak bainhira mak atu ramata mandatu iha instituisaun ne’e. Maibé, loloos, ramata iha tinan ida-ne’e”, Lere afirma.

Entretantu, Lere Anan Timur asume kargu nu’udár Xefe Estadu Maiór Jenerál F-FDTL ba daruak, hafoin Taur Matan Ruak, okupa pozisaun Prezidente Repúblika iha 2012 liubá.

Mandatu Lere Anan Timur hanesan Xefe Estadu Maiór Jenerál, tuir prazu nomeasaun ne’ebé iha, sei ramata iha outubru tinan ne’e.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here