Sekretáriu Jerál LFA, Alexandre Vong (karuk), akompaña husi Diretór Verifikasaun no Lisensa LFA, José Carvalho (loos) halo konferénsia imprensa. Imajen Tatoli: Hortencio Sanchez

DILI, 15 janeiru 2020 (TATOLI)–Sekretáriu Ezekutivu Liga Futeból Amadora (LFA), Alexandre ‘Lexy’ Vong hateten sira-nia parte halo ona preparasaun ba kongresu maibé atu hakat bá kongresu ekipa estrutura sei halo uluk reuniaum jerál anuál ne’ebé realiza iha fulan ne’e nia laran.

“Tuir estatuta LFA artigu 12, fó estensaun ba estrutura LFA tinan ida. Estensaun ba mandatu ida-ne’e hahú iha 4 marsu 2019 liubá. Kona-ba preparasaun kongresu, ekipa tékniku hahú iha agostu liubá (tinan kotuk) diskute ona no entrega ba ekipa jurídiku hodi prosesa no halo preparasaun. Ne’e mak ami halo uluk lai reuniaun jerál anuál  hafoin ramata mak ami konvoka loron ba kongresu,” Lexy ba Agência Tatoli iha Bairru Formosa, Dili, kuarta ne’e.

Nia hateten, hakarak ka lakohi kongresu tenke realiza duni iha tinan ida-ne’e nia laran no sei la liu hosi 4 marsu mai ne’e.

Entretantu, fó hanoin fali, estrutura LFA eziste iha 2015, iha ne’ebé lidera husi Prezidente Nilton Gusmão durante tinan haat maibé iha 2019 la konsege realiza kongresu ba daruak, nune’e hala’o de’it estensaun mandatu ba tinan ida tanba rejimentu LFA artigu 12 fó dalan.

Husi mandatu Nilton Gusmão ho nia ekipa konsege lidera jogu hotu la’o ho susesu durante époka primeira to’o kinta.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here