Vise-Ministru Negósiu Estranjeiru Japaun, Nakayama Norihiro. Imajen TATOLI/Cipriano Colo

DILI, 15 janeiru 2020 (TATOLI)–Governu Japaun mantein fó Apoiu orsamentu millaun $44 ba konstrusaun Aeroportu Internasionál Prezidente Nicolau Lobato, Comoro. 

Vise-Ministru Negósiu Estranjeiru Japaun, Nakayama Norihiro, ko’alia asuntu ne’e iha Palásiu Prezidente Nicolau Lobato, Bairru Pité, Dili, ohin, hafoin hasoru malu ho Prezidente Repúblika, Francisco Guterres Lú Olo.

“Kona-bá Aeroportu Internsionál Prezidente Nicolau Lobato iha soru-mutuk ho Primeiru-Ministru, Taur Matan Ruak no Prezidente Repúblika (PR), Francisco Guterres Lú Olo, temi mós kona-ba ida-ne’e. Kona-ba finansiamentu, Governu Japaun mantein oferese millaun $44. Japaun sei haree posibilidade ida-nee”, Nakayama haktuir.

Nakayama mós informa katak Governu Japaun sei apoiu konstrusaun Aeroportu Internasionál ne’e, maibé sei iha limitasaun, tanba ne’e orsamentu to’o de’it millaun $44.

“Durante enkontru, ha’u hamutuk ho Prezidente Repúblika diskute kona-ba ne’e, no PR Lú Olo sei kontinua halo diskusaun ho Primeiru-Ministru, Taur kona-ba realizasaun projetu ne’e”, nia hateten tan.

Antes ne’e, Embaixadór Japaun iha Timor-Leste, Hiromi Minami haklaken konstrusaun Aeroportu Internasionál Prezidente Nicolau Lobato Comoro, sei hahú iha fulan-marsu 2020.

Embaixadór ne’e mós promete katak Japaun rasik mak sei fó apoiu tékniku ba projetu konstrusaun refere.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here