Ministru Agrikultura no Peska (MAP), Joaquim Jose Gusmao dos Reis Martins. Imajen/ Jogerjo Guterres

DILI, 15 janeiru 2020 (TATOLI) – Ministériu Agrikultura no Peska (MAP) prevee osan hamutuk $961,795 iha proposta Orsamentu Jerál Estadu 2020 atu transporta produtu agrikultór sira-nian bá merkadu, maibé Governu hamenus ona ba $86,900.

Ministru Agrikultura no Peska, Joaquim José Gusmão dos Reis Martins, hatete merkadu ne’ebé agrikultór sira sei tau sira-nia produtu maka Loja Agrikultór rua iha Dili ne’ebé lokaliza iha Plaza no Fatuhada.

“Iha OJE 2020, iha orsamentu ida antigu ne’e, ami iha inisiativa foun ida maka hakarak atu fó subsídiu ba transporte ba produtu hosi agrikultór hothotu hodi transporta produtu agrikultór sira hosi munisípiu mai ne’e (Dili)”, Ministru Joaquim afirma iha Parlamentu Nasionál, ohin.

Tanba agora daudauk agrikultór sira sei depende ba transporte públiku ne’ebé mak karun tebetebes. “Tanba ne’e maka MAP iha inisiativa atubele tau osan hamutuk $961,795 hodi subsidia ba transporta produtu agríkola, maibé osan ne’e tenke ko’a no hela de’it $86,900”, ministru katak.

Produtu ne’ebé presiza atu lori husi munisípiu bá merkadu mak hanesan ortikultura (repollu, tomate, fehuk, mostarda no seluk tan).

Rezultadu husi to’os-na’in sira-nian ne’ebé atu transporta ne’e sei liuhosi asosiasaun agrikultór ne’ebé MAP estabelese iha munisípiu mai loja.

“Osan sira ne’e ko’a tiha balun, ne’ebé hela uitoan ne’e koko atu jere no espera ho osan ne’ebé prevee ona bele iha rezultadu ne’ebé di’ak”, katak.

Loja Agrikultór iha Dili akumula produtu mai hosi agrikultór sira hosi munisípiu. Produtu sira ne’e hanesan foos, ai-fuan (ai-nanas, hudi, sabraka, abakate, uvas, salak, no ai-fuan seluk), no modo sira (hanesan; repollu, mostarda, kanko, no seluk tan), talas, no fehuk.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here