Diretór Ezekutivu Fórum Organizasaun Naun Governamentál Timor-Leste (FONGTIL), Daniel Santos do Carmo. Imajen Tatoli/Cipriano Colo

DILI, 15 janeiru 2020 (TATOLI)—Ezekusaun Orsamentu Jerál Estadu (OJE) tinan 2019 atinje de’it pursentu 84, nune’e sosiedade sivíl husu Primeiru-Ministru (PM), Taur Matan Ruak, presiza halo evaluasaun ba membru Governu sira. 

“Primeiru-Ministru atu susesu, ninia xave maka ministru, vise-ministru no sekretáriu estadu sira. Bainhira membru Governu sira-nia ezekusaun la’o ladi’ak, implika ba ezekusaun jerál. Ida-ne’e tenke avalia prestasaun serbisu membru Governu sira, tanba iha ninia lideransa ne’ebé lidera instituisaun ne’e ninia ezekusaun labele atinje pursentu 100, ne’e kabe ba kapasidade”, Daniel dehan ba Agência Tatoli iha nia knaar fatin, Caicoli, Dili, ohin.

Daniel esplika, iha avaliasaun ne’e, atu hatene kona-ba membru Governu ninia kapasidade, ninia ekipa ne’e iha duni méritu ka lae, forte ka lae, enkuantu fasilidade ba bens serbisu no buat hotu iha, maibé ekipa ne’ebé halo serbisu ladi’ak.

“Tanba ne’e, avaliasaun ba rezultadu ne’e tenke iha no Primeiru-Ministru mak halo ida-ne’e. Tanba ne’e maka ema dehan remodelasaun ne’e mosu tanba rezultadu avaliasaun ba ezekusaun orsamentu ne’e. Ezekusaun ladi’ak, problema iha membru Governu ninia kapasidade lideransa atu organiza. Remodelasaun ne’e tenke mai husi rezultadu serbisu”, Daniel subliña.

Antes ne’e, Ministra Finansa Interina, Sara Lobo Brites deklara ona katak ezekusaun Orsamentu Jerál Estadu foin atinje pursentu 84 no la konsege ezekuta pursentu 16.

Nia dehan, ezekusaun to’o de’it pursentu 84 tanba Prezidente Repúblika, Francisco Guterres Lú Olo promulga Orsamentu Jerál Estadu 2019 iha fulan fevereiru no foin ezekuta iha marsu 2019.

Planu ezekusaun OJE 2019 ho montante biliaun $1.482, ezekuta ona biliaun $1.240-resin (%84) no falta millaun $200 (%16).

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here