Supervisora Seniór Servisu Rejistrasaun no Verifikasaun Emprezariál, Ana Jeánnie Alexandre de Corte-Real.

DILI, 15 janeiru 2020 (TATOLI) – Supervisora Seniór Servisu Rejistrasaun no Verifikasaun Emprezariál, Ana Jeánnie Alexandre de Corte-Real, informa husi janeiru to’o dezembru 2019, SERVE rejista empreza hamutuk 3.326.

Tipu kompañia ne’ebé rejistu iha SERVE ne’e mak Empreza Empresário em Nome Individual (ENIN) hamutuk 1.703, Sociedade Unipessoal por Quotas Limitada (Unipessoal, Lda) 1.129, Sociedade por Quotas Limitada (Lda) 475, Sociedade Anônima (S.A) 13, Representação Permanente (R.P) 6, no Empresa Pública 0.

Ana Jeánnie hatutan totál empreza ne’ebé rejista komesa husi 2013 to’o 2019 mak 27.386.

Nia dehan atendimentu servisu SERVE iha tinan foun (2020) janeiru ne’e, mak inisia filafali, maibé emprezáriu sira entuziazmu tebes no kontinua rejista sira-nia empreza.

“Maski antes ne’e feriadu loron boot ba Natál no tinan foun nian, hafoin SERVE inisia fali  iha loron 6 janeiru, barak mak mai nafatin trata sira-nia dokumentu no balun mós rejistu foun, ne’ebé ha’u dehan sentidu entuziazmu iha nafatin”, Ana salienta iha edifísiu foun SERVE iha Hudi-laran, ohin.

Nia haktuir emprezáriu sira ne’ebé bá rejistu iha SERVE, timoroan barak liu kompara ho estranjeiru, maibé kompara husi aspetu seluk hanesan kapitál ka domíniu atividade sira ne’e estranjeiru domina.

Entretantu, Rejistu komersiál iha 2018 husi janeiru-novembru hamutuk 3.065 ho tipu mak ENIN 1.590, Unipessoal, Lda, 1.070, Lda 387, S.A 11, R.P 6, no E.P 1.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here