Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál, Lere Anan Timur. Imajen Tatoli/Egas Cristóvão

DILI, 15 janeiru 2020 (TATOLI)–Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur hateten instituisaun ne’e (F-FDTL) prepara ona ema rezistente ida atu lidera instituisaun ne’e, bainhira mandatu Lere ramata. 

“Ami prepara ona ema ne’ebé atu troka. Ema preparadu ona, maski iha defisiénsia balun, maibé ema ne’e preparadu”, Lere hateten hafoin hasoru-malu ho Prezidente Repúblika, Francisco Guterres Lú Olo iha Palásiu Prezidente Nicolau Lobato, Bairru Pité, Dili, ohin.

Maski lakohi temi naran, maibé Lere hateten, figura atu kontinua lidera instituisaun F-FDTL hafoin reforma, Lere rasik mak sei hatudu ema konfiável no rekomenda ba polítiku sira atu bele lidera.

“Ha’u nu’udár komandante, nu’udár xefe Estadu Maiór Jenerál Forsa Armada, ha’u iha responsabilidade boot, atu hatudu líder Forsa Armada ninian. Ha’u labele entrega instituisaun ne’e ba kualkér ema”, nia deklara.

Líder Forsa Armada ne’e fó ezemplu katak polítiku sira mós hanesan ne’e. Sira ne’ebé oras ne’e lidera nasaun, liuliu tuur iha órgaun Estadu importante sira, ka lori volante nasaun nian, ema mai hotu husi ai-laran.

“Primeiru Ministru tinan 24 iha ai-laran, Prezidente Repúblika mós tinan 24 iha ai-laran. Ha’u rasik mós tinan 24 iha ai-laran. Ami lakohi entrega vida instituisaun ka destinu instituisaun nasaun nian ba kualkér ema. Tenke entrega ba ema ne’ebé ami konfia. Entaun, sein dúvida kuandu entrega ba ne’e proposta husi ha’u, ba polítiku ida-ne’ebé mak tenke kaer”, Lere sita.

Lere hakarak evita situasaun balun hanesan agora ne’e iha ema balun ne’ebé mak lakohi ukun an mós sai ministru, deputadu no seluk tan.

Nia subliña katak ema ne’ebé atu kaer instituisaun Forsa Armada ne’e tenke iha duni responsabilidade boot no forte, nasionalizmu, no iha patriotizmu forte.

“Labele entrega fali instituisaun ne’e ba arte marsiál ida. Tanba, ha’u bele dehan katak bainhira iha ona estabilidade iha Forsa Armada, entaun Timor estável ona. Maibé, bainhira Forsa Armada la hakmatek, Timor mós sei la hakmatek. Tanba ne’e, bainhira mandatu hotu ha’u sei entrega ba ema ne’ebé bele”, Lere dehan tan.

Nia ko’alia ne’e ho sentidu katak agora daudaun molok entrega, tenke prepara jerasaun foun, hanesan ai ida karik, ai kuandu tuan ona tenke troka ho ai foun.

Maibé, nia hatutan, bainhira ai ne’e ai-daak, entaun tenke troka ho ai-daak, labele lori fali kakeu ida mak mai troka.

Mandatu Xefe Estadu Maiór Jenerál tuir prazu nomeasaun ne’ebé iha, sei ramata iha outubru tinan ne’e.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here