Vendedór ida dudu hela nia karrosa ho sasán hodi fa’an ba komunidade sira ne’ebé tuur hein hela mikrolete no karreta seluk iha terminál Taibesi. Imajen/Antonio Gonçalves.

DILI, 15 janeiru 2020 (TATOLI) – Xefe Unidade Misaun Timor-Leste, Indonézia, Austrália-Kreximentu Triángulu (TIA-GT, sigla inglés), João Gonçalves, hateten atu hasa’e kreximentu ekonómiku Timor-Leste tenke dezenvolve setór prioritáriu sira hanesan, turizmu, agrikultura no peska.

“Ha’u akompaña previzaun kreximentu ekonómiku hosi Banku Mundiál nian maka porsentu 4,9, ha’u bele dehan katak kreximentu ekonómiku pozitivu ne’e buat di’ak ida más kompara ho ita-nia nesesidade, situasaun kiak iha rai-laran ne’ebé buat sira ne’e hotu ita presiza iha kreximentu ekonómiku boot liu ida ne’e para bele kontribui ba hamenus kiak”, ekonomista timoroan ne’e dehan ba TATOLI iha Parlamentu Nasionál, ohin.

Atu hamenus kiak iha rai-laran, tuir previzaun Xefe Unidade Misaun ne’e katak kreximentu ekonómiku mínimu Timor-Leste tenke hetan maka porsentu 8, ne’ebé ho númeru hosi Banku Mundiál ne’e seidauk sufisiente.

“Buat balu maka Governu presiza fó atensaun hanesan setór prioritáriu sira ne’ebé deside tiha ona atu dezenvolve para bele halakon dependénsia hosi Fundu Petrolíferu, maibé atu dezenvolve tenke tau osan”, eis governante ne’e afirma.

Aleinde ne’e, nia husu Governu tenke hanoin ona indústria ki’ik sira, nune’e aumenta valór ba matéria prima sira ne’ebé iha hanesan fábrika bamboo ne’ebé kria ona iha Tibar, nune’e mós rai-mean ne’ebé bele halo batako hodi halo uma no buat seluk sira.

“Maibé buat sira ne’e labele hein de’it Governu maka investe, más tenke enkoraja setór privadu sira hodi investe iha inisiativa sira ne’e. Konserteza investe presiza iha kondisaun sira ne’ebé ha’u hanoin setór privada sira agora daudauk sei enfrenta nafatin difikuldade, ida maka asesu ba kréditu”, katak.

João Gonçalves dehan bainhira Governu la atinje kreximentu tuir previzaun maka kiak iha Timor-Leste sei aumenta.

“Iha mós impaktu ba área sira seluk hanesan; kriasaun postu serbisu, dala barak mós bele provoka inflasaun. Kuandu Governu ezekuta osan ne’e ho di’ak no fó mós atensaun ba programa sira seluk atu dezenvolve setór prioritáriu sira no haree mós ba apoia dezenvolvimentu setór privadu, ha’u fiar ita-nia ekonomia la’o di’ak uitoan ona”.

Tuir relatóriu Banku Mundiál nia ne’ebé foin lansa sobre ekonomia Timor-Leste nian hatudu katak kreximentu ekonómiku sei aselera ba porsentu 4.9 iha 2021 no espera iha tinan ne’e rekupera ba porsentu 4.1.

Iha relatóriu ne’ebé publika ne’e, despeza públika iha semestre dahuluk 2019 mak porsentu 16 aas liu husi períodu hanesan iha 2018. Ida ne’e kontribui ba aumenta konfiansa husi konsumidór, enkuantu investimentu privadu mós tenke benefisia estabilidade polítika no ekonomia.

Relatóriu ne’ebé lansa dala rua iha tinan ida, Banku Mundiál analiza ekonomia nasaun no aprezenta evidénsia katak atividade ekonómika rekupera husi kontrasaun 2017-2018, dadus sujere ba parte rua despeza públika no konsume públika aumenta. Entretantu, perspetiva kreximentu ekonómiku iha médiu prazu nafatin prejudika husi setór privadu ne’ebé fraku.

Ekonomista seniór ba Banku Mundiál Timor-Leste, Pedro Martins, dehan Timor-Leste simu filafali kreximentu Produtu Internu Brutu (PIB), mas xave reforma importante hasa’e poténsia setór privadu no atende meta polítika Governu nian ne’ebé inklui taxa média kreximentu ekonómiku hosi porsentu 7 ba leten no kriasaun postu traballu maizumenus 60.000 kada tinan.

Iha ambiente makroekonómiku nafatin estavel. Inflasaun presu konsumidór tun no presaun ba apresiasaun taxa kámbiu reál diminui. Kréditu ba setór privadu sa’e porsentu 13, tanba demanda ne’ebé aas husi umakain.

Iha relatóriu ne’e mós hatudu katak setór privadu sei hasoru difikuldade hanesan durasaun ba lisensa negósiu maka demora tebes, difísil asesu ba kréditu no asesu ba rai atu halo negósiu.

Notísia relevante : Kreximentu Ekonómiku Timor-Leste sei Aselera Porsentu 4.9 iha 2021

Tuir Livru 1 Panorama Orsamentál 2020, Timor-Leste atu sai nasaun ho rendimentu médiu altu iha 2030, presiza kreximentu ekonómiku la’ós mina-rai ne’ebé forte no iha kualidade.

Investimentu públiku liuhusi polítika fiskál antesipada (frontloading  fiscal  policy) iha períodu 2008 to’o 2018 rezulta ona ba média kreximentu ekonómiku 4.7% kada tinan. Dezempeñu ne’e ho objetivu atu estabelese kondisaun nesesária ba dezenvolvimentu ekonómiku sustentavel ba tempu ne’ebé sei lidera husi setór privadu.

Kreximentu Produtu Internu Brutu (PIB) reál ba 2018 mak -0.8% sa’e kompara ho 3.8% iha 2017. Maske TL hetan resesaun ekonómiku, maibé konsome umakain kontinua sa’e iha períodu resesaun ne’ebé indika katak iha melloramentu ba padraun moris povu nia.

Iha dezafiu balun ne’ebé kontinua lori husi 2018 ba 2019, no sei afeta ba projesaun kreximentu ekonómiku. OJE 2020 ho montante biliaun $1,668 ne’ebé prevee sei kontribui ba kreximentu ekonómiku ho taxa kreximentu 6.0%.

Notísia relevante : OJE 2020, Medida Kontribui Kreximentu Ekonómiku Tun hosi %7.2 ba %6.0

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here