Tribunal Distritál Dili. Imajen/TATOLI

DILI, 14 janeiru 2020 (TATOLI) – Tribunál Distritál Dili (TDD), ohin, hala’o julgamentu ba arguidu nian rua ho inisiál JB no JM ne’ebé polísia detein iha área jurizdisaun Likisá nian tanba rai rama ambon lolon neen ho fiska ida bagajen motor.

Tuir akuzasaun Ministériu Públiku (MP) nian, iha loron 16 setembru 2017 iha ponte Laclo, Maubara, Munisípiu Likisá arguidu nain rua kondús motor marka revo injektion tama iha operasaun auto-estop  ne’ebé hala’o husi Polísia Nasionál Timor Lorosa’e (PNTL).

Iha pasa revista ne’e, polísia hetan rama ambon ho fiska iha bagajen motor no halo kedas detensaun ba arguidu sira. Maibé iha audiénsia julgamentu ne’e, arguidu sira deklara, rama ambon no fiska la’ós sira nain rua nian, mas sira hili de’it iha du’ut laran bainhira arguidu JB ba soe bee ki’ik iha du’ut laran.

Rona tiha husi parte rua, TDD adia julgamentu iha loron 17 janeiru 2020, tuku 11:00 OTL ho ajenda alegasaun finál.

Audiénsia julgamentu ne’e prezide husi juiz koletiva Edite Palmira, Ivan Suriaty no Patricia de Fatima. Prokuradór estajiadu ida mak reprezenta husi Ministériu Públiku no arguidu nain rua hetan asisténsia legál husi defensór públiku.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here