Xefe Departamentu Rejistu Veíkulu DNTT, Nelson Martins. Imajen/Tatoli Egas Cristovão

DILI, 14 janeiru 2020 (TATOLI) – Xefe Departamentu Rejistu Veíkulu Diresaun Nasionál Transporte Terrestre (DNTT), Nelson Sequeira Martins, husu ba komunidade sira bainhira atu taka estrada, tenke hato’o karta lisensa ba DNTT no bainhira laiha maka labele taka.

“Ita haree katak iha Dili laran kuandu mate no serimónia sira seluk, komunidade taka estrada derrepente sein hato’o karta ba DNTT no PNTL. Ha’u hanoin ida ne’e bá oin ami sei haree hodi foti medida”, nia dehan ba TATOLI iha Balidi, ohin.

Tanba tuir dekretu lei kódigu estrada númeru 5/2003 iha artigu ida fó permisaun katak ba komunidade sira ne’ebé maka atu halo atividade saida de’it iha sira-nia hela fatin hodi taka dalan tenke hato’o lisensa ba DNTT depois DNTT koordena ho PNTL maka foin taka estrada.

“Labele kualkér sidadaun ida taka estrada naran de’it. Tanba ne’e, bele kona multa tuir dekretu lei númeru 5/2003. Multa ne’e haree tuir kategoria estrada hanesan ba estrada públiku ne’e nia multa boot no estrada ki’ik ne’e multa tuir ki’ik nian”, Nelson dehan.

Iha futuru, DNTT sei halo revizaun ba dekretu lei kódigu estrada ne’e, atu nune’e submete ba Governu halo apresiasaun lori bá Parlamentu hodi sai lei, nune’e DNTT bele implementa ho rigór.

Tanba iha Dili ne’e fatin kloot ba beibeik haree ba populasaun ne’ebé aumenta kada tinan, dalan mós aumenta kloot, nune’e presiza bá oin kuandu komunidade sira atu taka estrada tenke hato’o karta lisensa uluk ba DNTT.

“Dalaruma haree komunidade sira taka estrada hanesan mate to’o fulan ida ne’e tuir loloos labele. Kuandu mate ne’e hakoi ona, estrada bele loke fali, ninian ai-funan maka tau fali lona, maibé tenke koordena ho ami, nune’e ami koordena ho PNTL atu haree posibilidade taka dalan parte balun de’it, la’ós taka tomak”, salienta.

Hodi dehan tanba Dili kloot, laiha dalan alternativu ida ne’e bele kauza ba movimentu ema nian no transporte liuliu ba kestaun engarrafamentu.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here