Prezidente Repúblika, Francisco Guterres Lú Olo. Imajen Tatoli/António Gonçalves

DILI, 14 janeiru 2020 (TATOLI) – Prezidente Repúblika (PR), Francisco Guterres Lú Olo, reprezenta Estadu, povu no nasaun Timor-Leste nia naran, hato’o Sentidu solidariedade ba vítima inséndiu iha nasaun viziñu Austrália. 

Mensajen ne’e haktuir, tinan hirak liubá, Australianu hamutuk na’in-173 lakon sira nia vida tanba inséndiu, ne’ebé halo timoroan sira mós triste hanesan viziñu no belun.

“Ohin loron, ha’u ho laran susar no triste akompaña trajedia ne’ebé invade dala ida tan iha rai Austrália”, refere mensajen solidariedade Xefe Estadu ne’ebé lee iha salaun Nino Konis Santana, Palásiu Prezidensiál, Bairro Pité, segunda ne’e.

Nia dehan, imajen sira ne’ebé mosu iha timoroan sira hotu nia matan liuhosi mídia sosiál, PR Lú Olo nota katak maluk Australianu sira triste tanba ahi halakon ema hirak ne’ebé sira hadomi.

“Ha’u hamutuk ho ema sira ne’ebé lakon sira nia uma no rikusoin, nu’udár rezultadu husi sira nia kosar-been no serbisu maka’as. Sira nia matan-been, liafuan laran moras, sira nia espresaun nakonu ho emosaun no xoke mós ha’u nia fuan”, nia akresenta.

PR mós sita, dadus konservativu hatudu katak vítima sira ne’ebé lakon vida mak animal millaun 500 resin no sai mós ameasa boot ba rikusoin hanesan animal no ai-horis Austrália nian.

Nune’e, Xefe Estadu konsidera trajedia hanesan ne’e iha ninia konsekuénsia ne’ebé difísil tebes atu bele sukat.

Tanba ne’e, Aman Nasaun ne’e konvida katak, tempu to’o ona atu ema hotu halo reflesuan ba mudansa klimátika ne’ebé sa’e maka’as liu.

Ho situasaun ne’e, PR rekonese katak dezastre naturál fó biban ema hotu atu prodús esperansa foun entre koñesimentu tradisionál no koñesimentu ne’ebé prodús husi siénsia no teknolojia modernu.

“Iha momentu terus no moras imi-nian, ami timoroan lori imi nia naran no husi ami-nia nasaun, ha’u ko’alia no ami deklara solidariedade ba buat hotu”, PR Lú Olo espresa sentidu solidariedade.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here