Pe. Júlio Crispim Belo. Imajen Tatoli/Cipriano Colo

DILI, 14 janeiru 2020 (TATOLI)—Jurista no Akademista, Pe. Júlio Crispim Belo konsidera pedidu urjénsia ba Proposta Lei Orsamentu Jerál Estadu (OJE) 2020 la efisiente no la efikáz. 

“Formalmente, prevee prosesu urjénsia iha artigu 97 Rejimentu Parlamentu Nasionál (RPN) ne’ebé dehan, objetu ba prosesu urjente ida maka proposta lei sira (nú.1), inisiativa prosesu urjénsia ba proposta lei kabe ba deputadu sira, bankada Parlamentár ka Governu nu’udar autór (nú.2). Prosesu urjénsia ne’e haruka ba Komisaun kompetente hodi apresia iha oras 24 nia laran no tenki elabora pareser fundamentada ruma (nú 3), nune’e husi pareser elaboradu, plenária delibera kona-ba prosesu urjénsia, no nia debate organizada husi konferénsia reprezentante bankada Parlamentár (nú 4)”, Padre Júlio esplika ba Agência Tatoli, iha nia rezidénsia, Praia dos Coqueiros, Dili, ohin.

Nia dehan, materialmente, Lei Orsamentu no Jestaun Finanseira (OJF) la prevee atu Governu halo pedidu prioridade no urjénsia ba Parlamentu Nasionál (PN) atu halo prosesu lejizlativu ba proposta lei OJE, tanba Lei ne’e, haree katak, ba proposta lei OJE, PN presiza tempu sufisiente (prinsípiu razoabilidade) atu bele ho seriedade hodi haree didi’ak, haree loloos, haree luan no haree kle’an tuir Prinsípiu Jerál Direitu no Nórma Jurídika aplikável, inkluindu konkretizasaun Programa Governu aprovadu tuir Planu Estratéjiku Nasionál hodi bele kumpre ezijénsia husi prinsípiu efisiénsia, prinsípiu efikásia no prinsípiu transparénsia (diskriminasaun reseita no despeza, inklui evita dotasaun ka fundu sekretu ruma) husi OJE (art. 145, nú 2 KRDTL).

Amu Júlio esklarese, iha kazu konkretu ba OJE 2020, ne’ebé hahú simu husi Prezidente PN nu’udar proposta lei OJE 2020 husi VIII Governu to’o nia aprovasaun, RPN prevee regra rasik ba nia prosesu sira (art. 162, to’o art. 169 RPN).

“Prosesu urjénsia previstu iha art. 97 RPN nu’udar regra esepsionál husi regra jerál previstu iha art. 106 RPN ba proposta lei baibain no labele aplika ba regra espesiál previstu iha art. 164 RPN ba proposta lei OJE, tanba proposta lei OJE iha nia regra rasik nu’udar regra espesífika; regra espesísifika prevalese sobre regra jerál (prinsípiu lex especialis derogat lex generalis)”, nia esplika tan.

Nune’e, nia hatutan, ba proposta lei OJE aplika maka regra espesífika iha RPN (la aplika regra jerál, nein aplika regra esepsionál); tuir regra espesífika iha RPN, ba elabora relatóriu no pareser fundamenta husi komisaun sira kona-ba OJE, iha durasaun loron 35 (kompostu husi loron 15 ba Komisaun Espesializada Permanente hodi halo nia pareser, loron 20 ba Komisaun Ekonomia no Finansa hodi halo nia pareser no relatóriu, la inklui loron 3 ba debate no aprovasaun iha jeneralidade, no mós la inklui debate no aprovasaun ba espesialidade ne’ebé la esede loron 10), molok iha ajenda plenária ba nia jeneralidade.

“Enkuantu, regra jerál iha RPN ba proposta lei baibain iha nia durasaun loron 7 ba komisaun kompetente hodi elabora pareser fundamentada, molok iha ajenda plenária ba nia jeneralidade. Maibé, regra esepsionál iha RPN ba proposta lei baibain iha de’it nia durasaun oras 24 ba Komisaun kompetente hodi elabora mós pareser fundamentada”, Pe. Júlio tenik.

Nune’e mós, nia argumenta tan, iha regra esepsionál ne’e dehan, pedidu urjénsia ba proposta lei baibain, plenária maka delibera no nia debate sira organiza iha konferénsia husi reprezentante bankanda Parlamentár sira, maibé iha regra espesiál, ba proposta lei OJE (art. 162 to’o art. 169 RPN), la prevee pedidu urjénsia, haruka Prezidente PN ordena nia distribuisaun ba bankada parlamentár sira, remete ba Komisaun Espesializada Permanente sira hodi elabora nia pareser setorál durante loron 15, depois remete ba Komisaun Ekonomia no Finansa (art. 163 RPN), bele konvoka mós partisipasaun husi membru Governu, hodi elabora relatóriu no pareser fundamentada durante loron 20 (art. 164 RPN), molok iha ajenda plenária ba nia jeneralidade (art. 165 no art. 166 RPN).

Entaun, nia akresenta, PN aprova prosesu urjente, katak aplika regra esepsionál (art. 97 RPN) ba proposta lei OJE, PN viola regra espesífika (art. 162 to’o art. 169 RPN) ba proposta lei OJE; violasaun ne’e implika invalidade prosedimentál hodi la prodús kualkér efeitu jurídiku.

Prosesu urjénsia ne’e, tuir nia, só relevante de’it ba proposta lei baibain hodi bele aplika regra jerál ka esepsionál iha RPN ba nia prosesu aprovasaun sira, katak, la aplika ba proposta lei OJE, tanba prosesu lejizlativu ba proposta lei OJE tenki kumpre nia regra espesífika sira prevee iha RPN (art. 162 to’o art.169 RPN), tanba husi durasaun ne’ebé regra espesífika ne’e prevee, iha loron 35, importa nesesidade no importánsia boot ba OJE hodi PN bele halo estudu, análize no apresiasaun ho sériu, loloos, didi’ak, luan no kle’an ba konteúdu no estrutura proposta lei OJE ne’e rasik, molok hetan aprovasaun husi PN (aprovasaun substansiál), la’ós urjente de’it, katak la fó tempu sufisiente, la sura loron, sura de’it oras, iha oras 24, depois teki-teki de’it, prosposta lei OJE hetan ona aprovasaun iha PN (pura no simples aprovasaun formál).

“Prosesu urjente ne’ebé aprovadu iha PN nu’udar resposta ba pedidu VIII Governu, la relevante no la prodús efeitu, tanba, iha realidade, prosesu lejizlativu relasiona ho proposta lei OJE 2020 ne’ebé la’o daudaun, PN la implementa prosesu urjente ho durasaun oras 24 (art. 97 nú 3 RPN), tanba prosesu lejizlativu hahú kedas ona iha loron PPN (Prezidente PN) simu proposta lei OJE 2020 husi VIII Governu (hahú simu iha loron 19 dezembru 2019 simu uluk rohan to’o iha loron 14 janeiru 2020 maka simu tan rohan) hodi hahú halo distribuisaun ba bankada Parlamentár iha loron 23 fulan-dezembru, ba komisaun sira atu halo apresiasaun durante loron 4 (husi loron 6 to’o loron 10 fulan-janeiru 2020), ba Komisaun C halo relatóriu no pareser fundamentada durante loron 4 (husi loron 10 to’o loron 14 fulan-janeiru 2020), molok plenária ba jeneralidade durante loron 3 (hahú husi loron 15 to’o loron 17 fulan-janeiru 2020), depois halo plenária ba espesialidade inklui votasaun finál globál durante loron 10 (hahú husi loron 20 to’o loron 30 janeiru 2020),” nia subliña.

“Ikus liu, halo redasaun finál ba PPN atu asina iha loron 31 janeiru 2020 hodi haruka nu’udar Dekretu-Lei OJE 2020 ba PR atu solisita nia promulgasaun. Nune’e, haree ba tempu Komisaun sira halo preparasaun no elaborasaun relatóriu ho pareser fundamentada ba proposta lei OJE 2020 iha durasaun loron 8 (molok sura loron 3 ba jeneralidade no loron 10 ba espesialidade); katak, nia durasaun liu oras 24 (viola regra esepsionál ba proposta lei baibain, maibé Governu (halo pedidu) no PN (aprova) hakarak aplika ba proposta lei OJE 2020) no liu loron 7 (viola regra jerál ba proposta lei baibain), maibé la to’o loron 35 (viola regra espesífika ba proposta lei OJE),” nia salienta.

Nune’e, konklui katak prosesu urjente (art. 97 RPN) ba proposta lei OJE 2020 (pedidu husi Governu no aprovadu husi PN), faktu hatudu katak PN la aplika, tanba haree katak la efisiente (tempu iha de’it durasaun oras 24. Tuir loloos ba OJE iha loron 35) no, de iure mós, PN labele aplika tanba haree katak implika invalidade jurídika (tenki aplika art. 162 to’o art. 169 RPN, la’ós aplika fali art. 97 RPN), nune’e la efikáz, (tanba, la prodús kualkér efeitu jurídiku).

“Atu dehan de’it, ba prosesu aprovasaun proposta lei OJE 2020, PN atu aplika prosesu urjente ne’e, maibé la efisiente no la efikáz (de facto no de iure); nune’e, PN nein uza prosesu urjente no nein uza prosesu jerál, maibé tendensialmente uza prosesu espesífika ne’ebé implika nafatin invalidade jurídika; tanba PN la observa didi’ak nórma jurídika aplikável no ezijénsia prinsípiu serteza jurídika no seguransa jurídika nu’udar fin direitu RDTL”, jurista ne’e haklaken.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here