Dosente Fakuldade Ekonomia no Jestaun Universidade Nasionál Timor Lorosa’e (UNTL), Fernando Baptista Anuno.

DILI, 14 janeiru 2020 (TATOLI) – Dosente Fakuldade Ekonomia no Jestaun Universidade Nasionál Timor Lorosa’e (UNTL), Fernando Baptista Anuno, hateten progresu ezekusaun Orsamentu Jerál Estadu (OJE) 2019 ho montante biliaun $1,482 ne’ebé atinje porsentu 84 ninia kualidade seidauk bele responde ekonomia normál iha Timor-Leste.

“Ezekusaun OJE 2019 bele atinje porsentu 84, maibé kualidade seidauk responde ein jerál hanesan situasaun ekonomia normál nian tanba OJE 2019 mós karik projetu hosi 143 seidauk selu hotu, nune’e empreza ida-idak bele kontinua ezekuta cash flow ka fluksu kaixa ba iha sira-nia investimentu”, manorin ne’e ba TATOLI liuhosi mídia sosiál, ohin.

Hodi hatutan dalan ida tan osan atu gasta, maibé sei iha pergunta oioin ba kestaun polítika sei bele rezolve lalais, nune’e bele garante sustentabilidade ba atividade hothotu liuliu ekonomia hodi garante objetivu Planu Estratéjiku Dezenvolvimentu Nasionál (PEDN) 2011-2030.

Atuál estudante doutoramentu iha Universidade Aveiru-Portugál ne’e hatutan kualkér ezekusaun bele atinje númeru ida ne’ebé boot, maibé responde ona objetivu PEDN ka seidauk tanba atu tama ona mandatu governasaun ba dala rua ou bele dehan dékada rua.

Tuir Fernando katak Produtu Internu Brutu (PIB) sei tun nafatin kuandu situasaun polítika la muda hodi nune’e bele orienta ba atividade ekonomia.

“Atinje númeru ne’ebé boot, maibé tenke justifika iha rezultadu iha ajente ekonómiku tantu produtór no konsumidór. Klaru katak atividade la’o hela, maibé ajente ekonómiku balun diminui tanba espetativa ba iha osan ne’ebé mak atu sirkula hodi kontinua insentiva nafatin sira”, Fernando afirma.

Nia fó ezemplu katak sirkulasaun OJE 2019 husi funsionáriu sira kuandu simu saláriu sei halo despeza, signifika povu ne’ebé mak fa’an produtu agrikultura ruma sei hetan netik dólar ida, maibé kontinua diminui tanba espetativa ba situasaun ekonomia inserteza hela no seidauk garante ba iha atividade ekonomia normál. Simplifika katak entre ajente ekonómiku sira sei tahan hela osan balun atu gasta tanba inserteza ne’e no bele mós empreza balun hapara traballadór.

Iha parte seluk, Fernando afirma relasiona ba utilizasaun rejime doudesimál iha janeiru 2020 katak nia kualidade ba de’it iha ajente ekonómiku balun, maibé ajente ekonómiku prinsipál hanesan emprezáriu sira parese sei tahan kuandu emprezáriu balun sei iha kapitál, maibé diminui no balun bele taka atividade provizória hodi hein situasaun polítika normál atubele garante estabilidade atividade ekonómika.

“Orsamentu doudesimál só para responde item orsamentu balun de’it até hein OJE 2020 aprovadu no promulgadu, hodi rekupera fali maibé konseitu simples dehan tempu la’o beibeik maibé osan tama hanesan kapitál kleur la halimar ne’ebé ajente ekonómiku ida-idak mak sei sente (time value of money) konseitu iha Jestaun Finanseira. Previzaun hosi MF katak sei utiliza hikas OJE iha abríl ne’e mós depende lai ba kestaun polítika”, nia dehan.

Hodi haktenik: “Sera ké situasaun polítika agora sei la’o nafatin hanesan ne’e ou senáriu seluk sei tuirmai hanesan remodelasaun Governu ou hakat bá senáriu ida ikus mak EA II. Importante mak kestaun polítika atu nune’e bele rezolve kualkér atividade hotu-hotu iha Timor-Leste”.

Iha sorin seluk, ekonomista João Mariano Saldanha, realsa bainhira haree fali ba situasaun agora ho númeru membru Governu seidauk kompletu no haree ba kuantidade ezekusaun ba OJE 2019 ho porsentu 84 ne’e bele responde ou bele dehan puru ezekusaun.

“Se sukat ba progresu ekonomia iha ita-nia rai-laran hosi OJE 2019 nian ha’u bele dehan pozitivu. Moris ekonomia ne’e ha’u hanoin entre porsentu 3 to’o 5, hosi ne’e dook liuhosi tarjetu ne’ebé Governu dehan porsentu 7. Porsentu 3 to’o 5 ne’e sura hosi konsome, investimentu privadu, investimentu hosi Governu, importasaun no esportasaun, ne’e maka kreximentu ne’e pozitivu”, João Mariano Saldanha afirma.

Ekonomista ne’e haktuir tan, antes ne’e, Governu hateten kreximentu ekonómiku sei to’o porsentu 7 iha OJE sira liubá ne’e, maibé sasukat ne’e la to’o. Tuir PEDN 2011-2030, Governu nia alvu ba kreximentu ekonómiku ne’e porsentu 10 katak agora daudauk atinje porsentu 3 to’o 5 de’it durante tinan hira nia laran haree hosi 2017, 2018 negativu (-) entaun bele dehan kreximentu ekonómiku ne’ebé tuir alvu Governu dook hosi porsentu 7 no dook liután hosi porsentu 10.

Tuir João Mariano Saldanha nia haree hosi aspetu sosiál ba ezekusaun OJE 2019 ne’e kapasidade ezekusaun tenke iha no haree fali iha kualidade ezekusaun la atinje alvu porsentu 7 ba kreximentu ekonómiku.

Antes ne’e, Ministra Finansa interina, Sara Lobo Brites, informa Governu la konsege ezekuta Orsamentu Jerál Estadu (OJE) 2019 porsentu 16.

Atuál Vise-Ministra Finansa ne’e argumenta, porsentu 16 ne’e kompara ba montante karik hamutuk millaun $200.

“Ko’alia kona-ba ezekusaun ba ita-nia planu bazeia ba montante OJE 2019 nian hamutuk biliaun $1,482 ne’e, ami ezekuta pur volta biliaun $1,240-resin, entaun sei iha millaun $200 mak la ezekuta, maibé ida ne’e ita ko’alia kona-ba orsamentu entaun to’o fim do ano kuandu la ezekuta ne’e nia hangus ona tanba orsamentu ne’e planu, ne’ebé kuandu ita la gasta ne’e kaduka”, Sara dehan.

Razaun ezekusaun to’o porsentu 84, Sara Lobo Brites esplika orsamentu 2019 promulga iha fevereiru 2019 no hahú ezekusaun iha marsu 2019.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here