Inaugurasaun projetu konstrusaun Edifísiu Foun Fakuldade Enjiñaria, Siénsia no Teknolojia, UNTL. Imajen: Nelia Fernandes

DILI, 14 janeiru 2020 (TATOLI) – Vise-Ministru Negosiu Estranjeiru Asuntu Parlamentár Japaun, Nakayama Norihiro, ohin, inaugura projetu konstrusaun Edifísiu Foun Fakuldade Enjiñaria, Siénsia no Teknolojia, UNTL iha Hera ne’ebé hetan apoiu orsamentu husi Governu Japaun.

Nia informa, Projetu Konstrusaun Edifísiu Foun ne’e ho objetivu atu kontribui ba melloramentu ambiente aprendizajen no dezenvolvimentu rekursu umanu industriál Timor-Leste nian ne’e, konstrui ho valór orsamentu ¥2.231 billaun (kuaze $21 millaun).

“Konstrusaun refere implementada husi fevereiru 2018 to’o outubru 2019  (fulan 19) hosi Rinkai Nissan Construction Co., Ltd ho supervizaun hamutuk hosi Yamashita Sekkei Inc no Intern Consulting, Inc ho valór orsamentu ¥2.231 billaun (kuaze UDS21m) ne’ebé fó serbisu ba traballadór ema 122,” dehan   Nakayama Norihiro, iha inaugurasaun konstrusaun refere iha Hera, Dili, tersa (14/1/2020).

Nia esplika, projetu ne’e konstrui ho aula 20 ne’ebé aula 15 bele akomoda ema 40 no aula 5 bele akomoda ema na’in 80. Entre aula hirak ne’e, nia informa, iha mós auditorium ho kadeira 400, biblioteka, eskritóriu ba dekanu no dosente sira, no asesu dalan ba ema ho difisiénsia sira.

“Ekipamentu hamutuk tipu 39 mak entrega ba FEST iha 12 jullu 2019 ba aprendijazen no laboratóriu departamentu lima mak Enjiñaria Informátika, Enjiñaria Jeologia no Petroleu, Enjiñaria Mekánika, Enjiñaria Sívil, Enjiñaria Elektrika no Elektrónika,” nia haktuir.

Iha adisaun ba konstrusaun edifísiu foun refere, nia infroma, oras ne’e JICA implementa hela projetu hasa’e kapasidade edukasaun no peskiza iha Fakuldade Enjiñaria, Siénsia no Teknolojia (FEST). Projetu refere hahú husi 2016 no sei ramata iha Marsu 2020 ne’e,” nia dehan.

Notísia relevante:Lounguinhos: “Enjeñária No Saúde Presiza Kondisaun Espesífika no Diferente”

Jornalista :  Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here