Prezidente Konsellu Veteranu, Vidal de Jesus 'Riak Leman' ko'alia ho imprensa, hafoin hasoru malu ho Prezidente Parlamentu Nasionál, Arão Noé de Jesus da Costa Amaral, iha Parlamentu Nasionál, tersa ne'e. Imajen/Evaristo Soares Martins.

DILI, 14 janeiru 2020 (TATOLI) – Hafoin Kongresu Nasionál Veteranu Kombatente Libertasaun Nasionál ramata no estabelese estrutura ba períudu 2019 to’o 2024, maibé to’o agora seidauk iha fatin serbisu (sekretariadu), tanba ne’e Prezidente Konsellu Nasionál Veteranu, Vidal de Jesus ‘Riak Leman’, husu Parlamentu Nasionál (PN) konsidera proposta adisionál iha Orsamentu Jerál Estadu (OJE) 2020.

Riak Leman hato’o asuntu ne’e bainhira halo audiénsia urjénsia ida ho Prezidente Parlamentu Nasionál (PPN), Arão Noé de Jesus da Costa Amaral, hodi ko’alia kona-ba edifísiu tanba Konsellu Veteranu daudaun ne’e laiha edifífisiu atu halo serbisu, hafoin Kongresu Nasionál hodi estabelese estrutura.

“Ami laiha fatin atu serbisu, ami ba haree Casa Europa, uma ne’e dodok hotu. Ami la barani atu ba serbisu iha ne’ebá, sé serbisu mak rai nakdoko dala-ida uma duku ita mate ou halai sai. Tanba ne’e ohin ami hasoru malu ho Prezidente Parlamentu Naisonál atu konsidera proposta audisionál ruma”, nia tenik hafoin hasoru malu ho PPN iha uma fukun, tersa ne’e.

Notísia Relevante: Riak Leman, Prezidente Konsellu Nasionál Veteranu

Nune’e, nia haktuir, konsellu ba haree ona fatin balun iha área Caicoli maibé presiza osan boot atu halo reabilitasaun.

Veteranu ne’e observa, konsellu hamriik ona maibé fatin atu halo serbisu mak susar tebes, tanba ne’e presiza ko’alia ho PPN atu haree orsamentu ruma hodi bele prevee ba reabilitasaun edifísiu.

“Tuir loloos ne’e haree tiha fatin mak ami bele halo serbisu. Problema ida ne’e mak mai ko’alia ho Prezidente Parlamentu Nasionál bele haree tanba orsamentu atu besik tama ona ne’ebé bele tau mós orsamentu ruma atu hadi’a ami-nia fatin hodi halo serbisu”, nia akresenta.

Nia mós haktuir, iha Komisaun Omenajen serbisu ladi’ak tanba fatin laiha, tanba ne’e tenke iha fatin atu halo serbisu no haree mós ba dokumentu barak ne’ebé mak rai hotu iha komisaun omenajen.

“Ohin sujestaun ida maka atu haree fatin balun iha área Taibessi nian. Ami sei lori enjeñeiru sira hodi haree pelumenus atu halo reabilitasaun ne’e presiza osan hira, ida ne’e mak ami sei halo”, Veteranu ne’e subliña.

Nia hatutan, problema agora mak Konsellu Veteranu harii ikus no proposta orsamentu hosi Sekretaria Estadu Asuntu Veteranu no Libertasaun Nasionál nian tama tiha ona iha meza Parlamentu.

Biban ne’e, PPN Arão Noé, hateten problema Konsellu Veteranu nian konsideradu.

“Membru meza sujere foti edifísiu ida iha Taibessi (Eis Kuartél Jenerál Portugés), iha merkadu nia okos, tanba edifísiu ne’e sei mamuk hela tanba ne’e bele uza. Ida ne’e sujestaun de’it mas kompeténsia atu deside ne’e Ministériu Justisa nian, tanba ne’e mak sira propoin sé bele parlamentu konsidera adita tán orsamentu ruma ba iha Sekretariu Estadu Kombatente nian”, dehan PPN.

Nia salienta, atu halo proposta adisionál ne’e kompeténsia Komisaun F ne’ebé trata asuntu veteranu nian.

Proposta foun hosi Ministériu Asuntu Kombatente Libertasaun hamutuk millaun $101,008, kompostu hosi saláriu no vensimentu $575.000, bens no serbisu millaun $6,040, transferénsia públika millaun $91,426, kapitál menór $551.000 no kapitál dezenvolvimentu millaun $2.416.

Hosi totál orsamentu millaun $ 101,008 ne’e ba Gabinete Sekretariu Estadu Asuntu Kombatente Libertasaun Nasionál millaun $1,149, Gabinete Inspesaun no Auditória $111.000, Diresaun Jerál ba Asuntu Kombatente Libertasaun Nasionál millaun $1,894, Diresaun Nasionál Aprovizionamentu no Lojístika $292.000, Diresaun Nasionál Administrasaun no Finansas, millaun $1,033, Diresaun Nasionál Jestaun Patrimóniu no Programa millaun $3,658 no Diresaun Nasionál Pensaun no Subvensaun millaun $92,725.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here