Empreza Crown, Unipessoal, Lda entrega ona ekipamentu sukat no forsa asphalt (Falling Weigth Deflectometer ba Ministru Obra Públika, Salvador Soares dos Reis Pires, Imajen/Tatoli Egas Cristovão.

DILI, 14 janeiru 2020 (TATOLI) – Kompañia Crown Unipesoál, Lda, entrega ona ekipamentu peskiza Falling Weight Deflectometer (FWD) ba Ministériu Obra Públika liuhusi Diresaun Nasionál Peskiza no Laboratóriu atu teste kualidade obra estrada sira iha territóriu.

“Ekipamentu ne’e presiza duni no ajuda tebes Diresaun Peskiza no Laboratóriu atu mellora kontrolu kualidade obra sira liuliu estrada sira”, Ministru Obra Públika Salvadór Eugénio Soares dos Reis hatete hafoin simu ekipamentu peskiza ne’e iha Sentru Peskiza no Laboratóriu, ohin.

Ministru Salvadór dehan ekipamentu ne’e mós apoia tebes Governu bainhira halo pagamentu liuliu haree nia kualidade.

“Ami hanoin sei kontinua hola ekipamentu sira liuliu ba teste besi sira atubele garante kualidade obra sira ne’ebé halo ho osan Estadu”, katak.

MOP mós husu ba Diresaun Peskiza no Laboratóriu atu uza ekipamentu ne’e ho responsabilidade hodi bele garante kualidade obra.

Diretór Peskiza no Laboratóriu MOP, Saturnino Gomes, afirma ekipamentu ne’e mai hotu ona, maibé falta karreta de’it mas kompañia mós garante ona katak sei to’o iha 3 fevereiru ne’e.

Diretór Saturnino Gomes dehan funsaun husi ekipamentu atu identifika kapasidade husi pavimentasaun estrada, sukat estrutura estrada kona-ba mahar, halo analiza ba estrutura estrada no identifika ba parte ne’ebé mak hadi’a no evaluasaun ba pavimentasaun projetu estrada antes halo pagamentu.

“Ekipamentu ne’e fasilita tebes ami atu hala’o serbisu hodi garante kualidade estrada iha Timor-Leste”, nia salienta.

Hodi dehan, kompañia mós iha responsabilidade atu hala’o instalasaun no fó formasaun ba tékniku sira liuliu iha MOP.

Entretantu, Diretór Kompañia Crown, João Mário Gama de Sousa, informa ekipamentu ne’e sosa husi Indonézia bainhira konkorre konkursu públiku no sai vensedór.

“Ekipamentu ne’e mai hotu ona, maibé falta karreta tanba prosesu tarde uitoan tanba feriadu loron boot, maibé ami fó garante karreta to’o iha 3 fevereiru”, garante.

Ekipamentu peskiza ne’e, Kompañia Crown Unipessoál, Lda, sosa husi Indonézia ne’ebé prodús husi empreza PT. Panairsan Pratama, hafoin sai vensedór ba konkursu públiku husi Komisaun Nasionál Aprovizionamentu (CAN, sigla portugés) MOP ho orsamentu rihun $272 ne’ebé prevee iha OJE 2019.

Ekipamentu FWD hirak kompostu husi parte tolu, dahuluk, mákina aparellu FWD ne’ebé kompleta ho nia asesoria hanesan komputadór prosesamentu sensor hodi leno ba estrutura estrada sira no seluk tan, daruak, karreta espesiál ne’ebé mak instala komputadór no asesoria sira seluk no ikus, kompañia mós iha responsabilidade atu instalasaun no formasaun ba ekipa téknika iha Diresaun Peskiza no Laborátoriu.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here