Xefe Departamentu Rejistu Veíkulu DNTT, Nelson Martins. Imajen/Tatoli Egas Cristovão.

DILI, 14 janeiru 2020 (TATOLI) – Diresaun Nasionál Transporte Terrestre (DNTT) Ministériu Transporte no Komunikasaun (MTK) rejista ona veíkulu importadu hamutuk 20.009 durante 2019.

Xefe Departamentu Rejistu Veíkulu DNTT, Nelson Sequeira Martins, informa importasaun karreta ne’e liuhusi fronteira terrestre no marítima.

“Iha área terrestre, karreta importadu tinan 2019 hamutuk 615 no hosi marítima 19.394”, dehan nia ba TATOLI iha Balidi, ohin.

Nia dehan hosi totál viatura 615 ne’ebé importa liuhusi rai-maran ne’e, hahú husi janeiru-dezembru, karreta 416 no motorizada 199, no liuhusi tasi hamutuk 19.394, karreta 3136 no motór 16.258.

Nune’e, husi totál importasaun viatura sira ne’e, DNTT kobre reseita ba Estadu hamutuk $1,641,439.50. Retornu ne’e rasik boot liu reseita DNTT nian iha 2018 mak $1,338,745.

Nia dehan, retornu sira ne’e mai hosi fonte hanesan, rejistu veíkulu hamutuk $1,308,365.50, pedidu xapa espesiál $16.200,00, gia de marsa $23.065.00, reseita hosi STNK nian ne’ebé ema selu iha banku hamutuk $1.870,00, lisensa trajektu $107.635,00, no inspesaun karreta importadu hamutuk $184.304,00.

“Reseita ne’e, ami hetan iha tinan 2018 ki’ik kompara ho tinan kotuk ne’ebé ita foin liu daudaun ne’e”, dehan.

Nia husu, bá oin Governu tenke tau-matan liután ba iha DNTT, tanba nu’udar mós fonte reseita ida ba Estadu, ein termu ekipamentu hodi fó atendimentu di’ak liután ba públiku.

“Tinan ne’e, ami komprende katak Governu la tau osan ba fundu dezenvolvimentu, maibé 2021 Governu tenke tau ona osan hodi dezenvolve di’ak liután DNTT no ami fiar kuandu Governu tau ona atensaun, reseita ba DNTT sei sa’e liután”, konklui.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here