Reitór UNPAZ eleitu, Adolmando Soares Amaral. Foto TATOLI/Tomé Amado

DILI, 14 janeiru 2020 (TATOLI)—Reitór Universidade da Páz (UNPAZ), Adolmando Amaral hateten maski Governu ne’ebé lidera husi Primeiru-Ministru, Taur Matan Ruak nia ezekusaun Orsamentu Jerál Estadu (OJE) 2019 atinje pursentu 84 maibé laiha impaktu ruma ba dezenvolvimentu.

“Ita haree Governu ezekuta ona Orsamentu Jerál Estadu 2019 to’o pursentu 84 maibé ita la haree nia impaktu ba dezenvolvimentu. Osan ita gasta hotu ona maibé dezenvolvimentu ita la haree. Ita sei problema ho estrada. Ita sei problema ho eletrisidade mate-lakan. Kuaze infraestrutura bázika ita problema hotu. Povu la sente impaktu dezenvolvimentu,” Adolmando ba Agência Tatoli, iha nia knaar fatin, kampus UNPAZ, Dili, tersa ne’e.

Tanba ne’e, nia konsidera VIII Governu laiha kapasidade jestaun atu halo ezekusaun ba orsamentu no programa prioridade ne’ebé nia rasik kria.

Entretantu, Adolmando kompara ho VII Goveru ne’ebé lidera husi Primeiru-Ministru, Marí Alkatiri, la’o ho orsamentu duodésimu de’it maibé povu sente ekonomia iha rai-laran la’o.

”Ha’u haree VII Governu la’o fulan sia de’it maibé halo duni buat balun. Ekonomia la’o. Ema hotu sente nia rezultadu.

Nia rekomenda ba Governu di’ak liu tau orsamentu ne’ebé sukat mós ho kapasidade membru Governu nune’e bele ezekuta ho di’ak para fó benefísiu ba povu.

Orsamentu Jerál Estadu 2019 ho montante biliaun $1,482. Hosi montante orsamentu ne’e, tuir Ministra Finansa Interina, Sara Lobo Brites katak Governu ezekuta purvolta biliaun $1,240-resin (%84) no sei iha millaun $200 mak la ezekuta (%16).

“Ha’u hakarak informa katak taxa ezekusaun OJE 2019 nian pursentu 84. Pursentu 16 mak la konsege ezekuta”, Sara Lobo dehan iha Parlamentu Nasionál, foin lalais ne’e.

OJE 2019, Prezidente Repúblika (PR), Francisco Guterres Lú Olo, promulga iha 7 fevereiru ho montante biliaun $1,482, hafoin hasai orsamentu millaun $650 hodi sosa partisipasaun konsórsiu iha projetu Greater Sunrise.

Iha 18 fevereiru, Ministériu Finansa fahe pakote orsamentu 2019 ne’ebé aprovadu ona ba liña ministériu no instituisaun Estadu sira, nune’e hahú ezekuta orsamentu no hakotu rejime duodesimál.

Husi montante ne’e, distribui ba kategoria Saláriu no Vensimentu millaun $214, Bens no Servisu millaun $472,9, Transferénsia Públika millaun $362, Kapitál Menór millaun $31,2 no Kapitál Dezenvolvimentu millaun $400,7.

Jornalista: Hortençio Sanchez

Editór: Xisto Freitas

 

HAKEREK NO HATÁN

Please enter your comment!
Please enter your name here