iklan

NASIONÁL, DESPORTU, HEADLINE

Tempu Besik Governu Instala Moru Asegura Komunidade Manleuana

Tempu Besik Governu Instala Moru Asegura Komunidade Manleuana

Ministru Obra Públika, Salvador Soares dos Reis Pires. Imajen Tatoli/António Gonçalves

DILI, 13 janeiru 2020 (TATOLI)–Ministru Obra Públika, Salvador Soares dos Reis Pires hateten Governu halo ona levantamentu dadus ba komunidade Suku Manleuana, Postu Administrativu Dom Aleixo, Munisípiu Dili, ne’ebé foin lalais afetadu ba dezastre naturál (mota estraga uma).

Tanba ne’e, nia dehan, tempu besik Governu sei instala moru iha mota ninin nune’e labele fó tan amesa ba komunidade nia hela fatin.

“Governu halo ona levantamentu dadus maibé seidauk ramata. Maibé, ami ko’alia ona oinsá haree tempu besik nia laran bele halo atuasaun no halo netik konstrusaun ruma atu tempu udan labele estraga tan komunidade nia hela fatin,” dehan Salvador iha Palácio do Governo, Dili, segunda ne’e.

Nia haktuir, antes ne’e, Governu nia instalasaun iha mota ninin área refere uza “bronjo” hetan estragu hosi komunidade rasik tanba ko’a rede ne’ebé instala iha mota ninin.

“Instalasaun uluk ne’e “bronjo” maibé ema balun mak ba tesi tiha besi entaun fatuk sira monu sai mak foin lalais mota tama,” Salvador katak.

Entretantu, relasiona ho orsamentu atu aloka ba harii konstrusaun refere sei iha prosesu nia laran no seidauk hatene loloos ninia montante.

Fó hanoin fali, durante dezastre naturál ne’ebé akontese iha Manleuana rezulta estraga uma komunidade nian hamutuk 205 inklui ho sasán uma-laran.

Jornalista: Hortençio Sanches

Editór: Xisto Freitas

iklan
iklan

Leave a Reply

iklan
error: Content is protected !!