Sekretáriu Estadu Arte no Kultura, Teófilo Caldas. Imajen/António Gonçalves

DILI, 13 janeiru 2020 (TATOLI) – Sekretáriu Estadu Arte no Kultura (SEAK), Teofilo Caldas hateten, sei responsabiliza atividade kulturál iha eventu desportiva CPLP (Comunidade dos Países da Língua Portuguesa) ne’ebé tuir planu sei realiza iha Timor-Leste iha 12 jullu 2020 be mai.

Tanba ne’e, nia husu ba Ministériu Edukasaun, Juventude no Desportu (MEJD) ne’ebé sai nu’udar prezidente komisaun organizadora iha eventu refere atu prevee orsamentu ba asuntu ida ne’e tanba SEAK laiha orsamentu atu suporta atividade kulturál hirak ne’e.

“Ami hanoin ona atu prepara mós atividade kulturál sira atu nune’e bele anima ita-nia bainaka sira. Ami hanoin atu realiza atividade noite kulturál no espozisaun ruma,” Teofilo Caldas dehan, iha enkontru preparativuskona-ba jogu CPLP iha salaun MEJD, Vila Verde, Dili, ohin.

Nia hatutan, atividade kulturál  sira ne’e atu ajuda vizitante sira depois ramata jogu sira, iha tempu kalan sira bele vizita espozisaun no asiste mós aprezentasaun atividade kulturál sira maibé problema ida mak finansiamentu.

“Ami la prevee orsamentu. Karik, komisaun organizadora prevee ona entaun ami sei la’o tuir orsamentu ne’ebé ita-boot (komisaun) prepara ona,” nia dehan.

Hatán ba asuntu ne’e, Ministra Edukasaun, Juventude no Desportu (MEJD), Dulce de Jesus Soares, hateten parte kultura mós importante tebes iha eventu ne’e. Tanba ne’e, nia informa, agora SEJD prevee ona orsamentu miliaun $2,250,00 ba eventu ne’e liuhusi dotasaun todo Governu.

“Planu ba orsamentu ne’e iha ona. Maibé planu orsamentu ne’e bainhira enkontru Konsellu Ministru bele aprezenta hotu ona”.

Entertantu, Sekretariu Estadu Juventude no Desportu (SEJD), Nelio Issac Sarmento, haktuir festa desportiva no konferénsia ida ne’e la’ós ezatamente desportiva de’it maibé oportunidade ba Timor-Leste atu fa’an ninia beleza ba país membru CPLP sira.

“Ita bele fa’an ita-nia turizmu, kultura no ita-nia hahan lokal rasik. Ita sei hatudu ba sira poténsia ne’ebé ita iha. Entaun, ita mak sei diskute iha parte téknika depois sei halo fali aprezentasaun iha enkontru tuir mai,” nia dehan.

Governante ne’e hatutan, bainhira iha diskusaun sira ne’e mak hotu-hotu konkorda ona ho ideia sira ne’e inklui orsamentu ne’ebé prevee, hafoin mak husu ba Ministériu Finansa aprova ka fó dalan hodi hetan orsamentu sira ne’e.

Notísia relevante:MEJD Preve $2,2 Millaun Ba Eventu CPLP

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here