Pe. Júlio Crispim Belo. Imajen Tatoli/Cipriano Colo

Mestre Pe. Júlio Crispim, Drs., MDPri.

Jurista no Akademista

Problema Orsamentu Jerál Estadu (OJE) 2020 hahú ho VIII Governu retira proposta lei OJE 2020 husi plenária PN; katak, bainhira VIII Governu deside retira OJE 2020 husi PN hahú hamosu problema jurídika-konstitusionál ba proposta lei OJE ne’e rasik; tanba, Governu nu’udar autór lei retira proposta lei OJE 2020 husi plenária PN ho baze legál artigu 95.º, n.º 2 RPN ne’e (cancelamento iniciativa lejislativa), la’ós nia dalan legál loloos, tanba baze legál refere bele aplika de’it ba proposta lei bai-bain, la aplika ba proposta lei OJE ne’ebé iha nia baze legál rasik (art. 162.º to’o art. 169.º RPN), mak Governu uza baze legál refere nu’udar dalan legál atu PN simu fali proposta lei OJE 2020 nu’udar renovasaun inisiativa lejislativa (art. 94.º, n.º 1 RPN) ne’ebé dehan autór labele renova fali nia inisiativa lejislativa iha sesaun lejislativa tuir mai [katak, VIII Governu labele renova fali nia inisiativa lejislativa iha sesaun lejislativa 2020, tanba retira OJE 2020 iha sesaun lejislativa 2019, só bele renova fali iha sesaun lejislativa 2021; signifika, ano fiskál 2020 la iha lei OJE; tuir loloos VIII Governu labele retira proposta lei OJE 2020 husi PN, maske iha reasaun ka krítika maka’as ba nia estrutura no nia montante, loloos bele hadi’a de’it iha komisaun kompetente; maske iha mós sinál atu PN la aprova proposta lei OJE 2020, loloos bankada Aliansa Mudansa ba Progresu (AMP) ho Governu halo de’it enkontru internu ruma hodi hetan entendimentu komun ida]. Katak, bainhira VIII Governu retira proposta lei OJE 2020 husi PN, signifika proposta lei OJE 2020 la existe ona iha esfera jurídika PN; nia konsekuénsia mak, la permite PN atu halo aprovasaun ba proposta lei OJE 2020; Bainhira, PN la aprova proposta lei OJE 2020 iha loron 60 nia laran (sura husi loron 15 fulan-outubru ne’ebé Lei orsamentu no jestaun finanseira (OGF-sigla portugés) no Rejimentu Parlamentu Nasionál (RPN-sigla portugés) prevee ona nu’udar prazu legál-konstitusionál), Konstituisaun Repúblika Demokrátika Timor-Leste (KRDTL) konsidera nu’udar “grave krize institusionál” (art. 86.º, al. f) KRDTL); nune’e, loke ona dalan ba PR atu bele dissolve PN.

Nu’udar hatene, VIII Governu hatama fali ona no PN simu fali ona proposta lei OJE 2020, maibé jurídika-konstitusionamente (DE IURE) proposta lei OJE 2020 ne’e la existe iha PN nia esfera jurídika, maske politikamente (DE FACTO) existe iha PN nia esfera polítika. Nia existénsia polítika la justifica nia existénsia jurídika [polítika bele kria lei, maibé lei mak sai baze no naroman hodi derije polítika, la’ós polítika mak derije lei, tanba RDTL ne’e, adopta no konsagra prinsípiu Estadu de Direitu Demokrátiku (art. 1,º, n.º 1 KRDTL) no prinsípiu subordinasaun Estadu ba Konstituisaun no Lei (art. 2.º, n.º 2 KRDTL)]; tanba, art. 30.º, n.º 2 Lei OGF (Lei Orsamentu no Jestaun Finanseira) haruka Governu atu hatama OJE ba PN to’o de’it loron 15 fulan Outubru (la’ós hatama to’o fali loron 19 fulan Dezembru ka to’o fali loron 14 fulan Janeiru) no art. 162.º, n.º 1 RPN (Rejimentu Parlamentu Nasionál) haruka PN atu simu OJE husi Governu to’o de’it loron 15 fulan Outubru (la’ós simu to’o fali loron 19 fulan Dezembru ka to’o fali loron 14 fulan Janeiru). Signifika, Lei OGF (lei substantiva ba elaborasaun OJE) no RPN (lei adjetiva ba aprovasaun proposta lei OJE) rasik taka ona dalan ba VIII Governu atu hatama proposta lei OJE ba PN no taka ona dalan ba PN atu simu proposta lei OJE husi Governu (de iure), maske (de facto) VIII Governu hatama ona no PN simu ona rohan ida iha loron 19 fulan Dezembru no rohan seluk, tuir planu, VIII Governu sei hatama no PN sei simu iha loron 14 fulan Janeiru 2020, katak OJE 2020 politikamente (de facto) existe, maibé juridikamente (de iure) la existe. Nune’e, inexisténcia jurídika ba proposta lei OJE 2020 implika invalidade ba nia existénsia polítika; tanba, tuir prinsípiu PRIMADO DA LEI Estadu bele atua de’it “secundum legem” (katak atua de’it tuir lei), labele atua “contra legem” (katak labele atua kontra lei) no labele atua “praeter legem” (katak labele haksoit liu lei); signifika, Estadu nia organizasaun no nia funsionamentu sira tenke subordina ba Konstituisaun no Lei (art. 2.º, n.º 2 KRDTL). Husi inexisténsia jurídika ba proposta lei OJE 2020; bele dehan proposta lei OJE 2020 jurídikamente la existe iha PN nia esfera jurídika; nia konsekuénsia mak, la permite PN atu halo aprovasaun ba proposta lei OJE 2020; Bainhira, PN la aprova proposta lei OJE 2020 iha loron 60 nia laran (sura husi loron 15 fulan Outubru ne’ebé Lei OGF no RPN prevee ona nu’udar prazu legál-konstitusionál), KRDTL konsidera nu’udar “grave krize institusionál” (art. 86.º, al. f) KRDTL); nune’e, loke ona dalan ba PR atu bele dissolve PN.

Tuir VIII Governu nia argumentu (iha nia karta akompañamentu) dehan proposta lei OJE 2020 hatama ona  ba PN iha loron 15 fulan Outubru, maibé retira tiha (katak hasai fali husi PN iha loron 3 fulan Dezembru) no hatama fila fali ba PN iha loron 19 fulan Dezembru konsideradu nu’udar “nova proposta lei OJE 2020” ne’e, atu enquadra ba “suspensão” husi prosesu lejislativu ba proposta lei OJE, konstituisaun no Lei sira la prevee regra ida ne’e, atu enquadra fali ba “nova proposta lei OJE 2020”, haree husi prazu legál ka prazu tuir Lei OGF no RPN, proposta lei OJE 2020 nia prazu KADUKA ona, tanba nia limite  legál (limite máximo) mak to’o 15 de Outubru; mak Governu entrega proposta lei OJE ba PN liu prazu legál ne’e, PPN uza nia kompeténsia (art. 17.º RPN) atu verifika uluk nia regularidade rejimentál mak PPN bele deside atu admite ka rejeita proposta lei OJE 2020  [art. 17.º, n.º 1, al. d) RPN konjuga ho art. 162.º RPN], mak la kumpre duni regularidade rejimentál, PPN labele  simu no no labele enkamiña ba komisaun kompetente sira [art. 17.º,  n.º 1, al. f) RPN konjuga ho art. 163.º RPN]; nune’e, maske proposta lei OJE 2020 iha fali ona PN, maibé jurídika-konstitusionalmente konsidera la existe iha esfera jurídika PN, tanba prazu legál kaduka ona no PPN la uza didiak nia kompeténsia atu verifika nia regularidade rejimentál kona ba prazu legál ne’e, hodi simu no distribui de’it. Signifika, proposta lei OJE 2020 politikamente (de facto) existe iha PN, maibé jurídika-konstitusionalmente (de iure) la existe iha PN hodi implika invalidade jurídika no la prodús kualker efeitu jurídiku. Tanba ne’e, la permite ona PN atu halo aprovasaun ba proposta lei OJE 2020; Bainhira, PN la aprova proposta lei OJE 2020 iha loron 60 nia laran (sura husi loron 15 fulan Outubru ne’ebé Lei OGF no RPN prevee ona nu’udar prazu legál-konstitusionál), KRDTL konsidera nu’udar “grave krize institusionál” (art. 86.º, al. f) KRDTL); nune’e, loke ona dalan ba PR atu bele dissolve PN.

To’o ikus mak, la permite duni PN halo aprovasaun ba proposta lei OJE 2020 durante loron 60 nia laran, PR dissolve PN, konsequentemente tenke realiza fali Eleisaun subsequente (ES), nu’udar termu konstitusionál, tuir art. 100.º KRDTL, signifika realiza fali Eleisaun Antesipada (EA), nu’udar termu polítika, hodi responde ba exijénsia husi prinsípiu legalidade demokrátika no prinsípiu legitimidade demokrátika ne’ebé fó baze no forsa ba RDTL hodi organiza-án no funsiona-án nu’udar Estadu de Direitu Demokrátika (art. 1.º, n.º 1 KRDTL).

Husi ne’e, karik ko’alia kona-ba REMODELASAUN Governu no REFORMA Governu, bele dehan jurídika-konstitusionalmente LA RELEVANTE ona; tanba la’ós ona problema liga ba ezekusaun programa Governu ne’ebé bele lori ba mosaun sensura (art. 111.º KRDTL) iha PN, ne’ebé karik aprovadu, bele implika demisaun Governu [art. 112.º, n,º 1, al. f) KRDTL], no mós la’ós problema liga ba kondisaun sira ne’ebé prevee rasik ba demisaun Governu (art. 112.º KRDTL) hodi bele afasta husi EA, maibé ne’e problema liga ba elaborasaun OJE husi Governu (art. 145.º, n.º 1, 1.ª parte KRDTL, konjuga ho art. 115.º, n.º 1, al. d) KRDTL no art. 22.º to’o art .30.º Lei OGF), no mós problema liga aprovasaun OJE husi PN  (art. 145.º, n.º 1, 2.ª parte KRDTL konjuga ho art. 95.º, n.º 3, al. d) KRDTL no art. 162.º to’o art . 169.º RPN) ne’ebé la permite PN aprova proposta lei OJE 2020, la bele afasta ona husi EA nu’udar “conditio sine qua non” (hakarak ka lakohi, tenke ba EA) hodi manifesta loloos Estadu RTDL nia prinsípiu “Subordinasaun ba Konstituisaun no Lei (art. 2.º, n.º 2 KRDTL) no nia prinsípiu “Direitu Demokrátika (art. 1.º, n.º 1 KRDTL) atu bele aplika al. a), n.º 1, art. 112.º KRDTL nu’udar konsekuénsia lojika husi rezultadu Demokrátiku iha aplikasaun art. 100.º KRDTL no art 106.º KRDTL.

Katak, liga ba  problema elaborasaun proposta lei OJE no aprovasaun proposta lei OJE mak Governu no PN la halo loloos tuir exijénsia legál-konstitusionál, dalan ikus mak PR dissolve PN no PR dekreta  EA, maske iha implikasaun boot ba kustu finanseiru hodi realiza fali EA, iha mós impaktu ba kustu no estabilidade ekonómika iha merkadu nasionál,  inklui mós reasaun negativa husi phsico-sosiál no phsico-polítika, liu-liu kona ba desmotivasaun (lakon motivu ba EA) no aborrecimento (baruk ba EA) husi sidadaun RDTL iha rai-laran no rai-liur ba realidade polítika ne’e (empasse polítika no lideransa iha krize); maibé, atu oinsá mós, iha problema PN la aprova proposta lei OJE 2020, PR dissolve PN, EA mak dalan ikus nu’udar solusaun legál-konstitusionál hodi bele assume poder polítiku (poder lejislativu no poder exekutivu) iha orgaun soberania RDTL.

Ikus liu, karik husi kolega sira sei bele hatudu loloos baze legál-konstitusionál ruma ba remodelasaun Governu, ne’e di’ak liu, tanba sei bele afasta EA, no bele kontribui di’ak liu tan ba dezenvolvimentu nasaun no konstrusaun Estadu RDTL.

Dili, loron 13 fulan-Janeiru 2020

OBRIGADO WAIN

HAKEREK NO HATÁN

Please enter your comment!
Please enter your name here