Adjunta Sekretária Jerál KO25 no atuál Prezidente CNJTL, Maria Dadi Soares Magno. Imajen Tatoli/Antónia Gusmão

DILI, 13 janeiru 2020 (TATOLI)–Prezidente Konsellu Nasionál Juventude Timor-Leste, Maria Dadi Soares Magno hateten preparasaun ba kongresu Konsellu Nasional Juventude Timor-Leste (CNJTL-sigla portugés) ne’ebé sei realiza iha loron 16 fulan ne’e atinje ona pursentu 85.

“Preparasaun sira-ne’e ita haree katak kuaze pursentu 85 maibé tarde uitoan maka konvite tanba ohin foin distribui, tanba ho razaun katak sei hein konfirmasaun husi lidér Kay Rala Xanana Gusmão nia aseitasaun ba diskursu iha abertura kongresu,” Maria Dadi dehan iha nia knaar fatin, Farol, Dili, ohin.

Nia esklarese, husi preparasaun ba to’o iha loron kongresu iha steering committee (komisaun organizadora) no komité ne’e rasik postura Konsellu Juventude Munisípiu sira maka prezide.

Kongresu Nasionál ne’e sei hala’o iha Sentru Konvensaun Dili (CCD-sigla portugés), durante loron tolu (16 to’o 18 janeiru), ne’ebé sei partisipa kongresista hamutuk 500 ne’ebé mai husi organizasaun masa rezisténsia no reprezentante joventude husi munisípiu 12 inklui Rejiaun Administrativa Espesiál Oé-Cusse Ambeno (RAEOA).

Prezidente ne’e subliña, tema jerál ne’ebé sei foti iha kongresu Nasional ne’e maka “Joven ba Paradigma Foun ba Transformasaun Globál’ no tema espesífika maka “Reforsa Papél CNJTL iha Prosesu Konstrusaun Estadu no Nasaun”.

Maria Dadi esplika katak Konsellu Nasionál Juventude Timor-Leste realiza kongresu nasionál ne’e tanba bazeia ba mandatu tinan lima.

“Kargu ne’ebé ha’u simu sai prezidente CNJTL hahú iha 2015 bainhira Timor-Leste sai uma-na’in ba Fórum Juventude Komunidade Lian Portugés,” Maria tenik.

Nia hatutan, durante nia mandatu serbisu hamutuk ho nia parseiru Sekretáriu Estadu Juventude no Desportu konsege prodús Polítika Juventude Nasionál.

Aleinde ida-ne’e, nia tenik, serbisu ho parseria lubuk ida inklui Governu rasik liga ba atividade interese juventude nian.

“Ita iha ne’e serbisu ho Fórum Juventude Komunidade Lian Portugés ne’ebé mak fórum ne’e rasik ho lideransa polítika sira hamutuk halo planu liuliu ba kapasitasaun lideransa,” Maria Dadi haklaken.

“Iha mós divizaun ida haree kona-ba asuntu esterna nian ne’ebé ita sei hateke ba CNJTL hanesan hetan mós membru planu direitu iha asembleia fórum hamutuk ho SEFOPE.  Iha divizaun ne’e ko’alia kona-ba Parlamentu Juventude Komunidade Lian portugés nian,” nia subliña.

Nia salienta, CNJTL mós iha divizaun sira ne’ebé liga ba informasaun rasik, maka kona-ba lian ingléz no CNJTL fó mós informasaun fulan tolu no fulan neen ba formasaun ITC (Information Technology & Information) nian, no mós liga ba kursu lian portugés rasik.

Prezidente CNJTL ne’e promete katak bainhira nia mandatu hotu nia sei ajuda Governu hodi haree ba joven sira ne’ebé nunka asesu ba edukasaun no formasaun.

“Ha’u-nia mandatu hotu, ba oin, ha’u sei haree kona-ba peskiza no sei iha estratéjia ajuda Governu. Estratéjia intervensaun liga ba oinsá mak atu redús kategoria joven ne’ebé nunka asesu ba edukasaun, formasaun no nunka asesu ba iha serbisu,” nia informa.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here