Vise-Prezidente Parlamentu Nasionál, Maria Angelina Lopez Sarmento. Foto Tatoli/ Egas Cristóvão

DILI, 13 janeiru 2020 (TATOLI)—Reuniaun extraordinária iha loron-segunda ne’e, líder bankada sira la konkorda habadak loron debate espesialidade proposta Orsamentu Jerál Estadu (OJE) 2020 ba loron-hitu (7) de’it, tanba rejimentu la fó dalan.

Tuir Rejimentu Parlamentu Nasionál, debate jeneralidade loron 3 no faze espesialidade loron 10.

Iha reuniaun extraordiária líder bankada ne’e partisipa hosi Ministru Reforma Asuntu Lejizlativa no Asuntu Parlamentár (MRLAP) En Ezersísiu atuál Sekretáriu Estadu Komunikasaun Sosiál, Merício Juvenal dos Reis Akara, ko’alia kona-ba preparasaun debate Orsamentu Jerál Estadu.

Tuir kalendáriu ne’ebé aprova antes ne’e, hahú debate jeneralidade iha 15 janeiru to’o 17 janeiru. Debate iha faze espesialidade hahú hosi 20 janeiru no ramata 30 janeiru 2020.

Kalendáriu diskusaun ne’e aprova iha 23 dezembru 2019 hafoin Governu husu pedidu urjénsia kona-ba diskusaun OJE 2020 nian.

Vise-Prezidente Parlamentu Nasionál, Maria Angelina Lopez Sarmento, hateten kalendáriu ne’ebé aprova antes ne’e loron 3 ba debate jeneralidade no loron 10 debate espesialidade, maibé relatóriu no pareser Komisaun C (Finansa Públika) nian ne’ebé apresia pedidu urjénsia ba debate Orsamentu Jerál Estadu (OJE) hosi Governu, iha ne’ebá Komisaun C rekomenda atu pedidu hosi Governu ne’e debate ho karáter urjénsia ne’e debate jeneralidade loron tolu no habadak debate faze espesialidade ba loron hitu (7) hosi loron 10.

“Maibé reuniaun líder bankada ohin deputadu sira kestiona kona-ba loron 10 ne’ebé mak iha rejimentu prevee maibé giaun ne’e tau de’it loron 7 kaer ba rezolusaun ne’ebé maka aprova iha 23 dezembru 2019 liubá, kona-ba relatóriu no pareser Komisaun C nian ba pedidu urjénsia ne’ebé hato’o no husu enkurta ba loron 7. Entaun, líder bankada ohin hola desizaun katak debate espesialidade ne’e sei la’o to’o loron 10”, Maria Angelina ba jornalista sira, iha Parlamentu Nasionál, segunda ne’e.

Tanba ne’e, debate jeneralidade sei hahú kuarta (15/1) to’o sesta (17/1/2020). Debate espesialidade hahú hosi 20 janeiru no ramata iha 30 janeiru 2020.

Deputada Maria Angelina Sarmento tenik Parlamentu sei foti mós loron sábadu (25 janeiru) hodi kontinua debate espesialidade, domingu deskansa, no kontinua fali iha 27 janeiru to’o 30 janeiru inklui aprovasaun finál  globál.

Nia haklaken, 31 janeiru Komisaun C sei halo redasaun finál, karik loron ida tomak no loraik sei haruka kedas ba Prezidente Repúblika.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here