Xefe Estadu Maiór Jenerál F-FDTL, Lere Anan Timur, kuda ai-oan. Imajen/Florencio Miranda Ximenes.

ATABAE, 13 janeiru 2020 (TATOLI)- Xefe Estadu Maiór Forsa Defeza Timor-Leste (F-FDTL), Majór Jenerál Lere Anan Timur, husu ba sidadaun tomak atu hadomi no asegura flora no fauna iha Timor-Leste.

“Timor-Leste tenke agradese ba ita-nia floresta tanba floresta laiha karik dala ruma ohin gerrilleiru sira mós laiha no la moris karik tanba rai mamuk no tetuk de’it Indonézia bele duni de’it ho elikópteru, ne’ebé iha tinan ne’e, presiza hadomi no asegura”, Majór Jenerál Lere hatete bainhira selebra loron nasionál Ai-kameli no Floresta iha plantasaun Ai-kameli Manduki, Suku Aidaba-Leten, Postu Administrativu Atabae, Munisípiu Bobonaro, ohin.

Majór Lere dehan hanesan ema ida presiza mós agradese ba floresta, maibé daudaun ne’e hahú mosu irresponsabilidade no ignoránsia halo abitante sira kontinua estraga flora no fauna.

“Tanba sira (abitante) ba hatún ka tesi no sunu ai boboot sira ne’e hodi halo to’os, depois tinan ida sira husik fali ho mamuk, mas ita labele fó kulpa ba ita-nia komunidade, maibé ba ministériu ne’ebé relevante, ba Ministériu Agrikultura no Peska mós”, katak.

Lere dehan iha tempu Indonézia, gerrilleiru sira mak fó seguransa ba floresta hodi ema labook no mós ba balada sira, maibé ohin loron haree ema tesi ai-laran hodi halo to’os.

Nune’e, Komandante F-FDTL ne’e husu ba MAP atu toma responsabilidade hodi asegura flora no fauna iha Timor-Leste. “Ita tenke asegura flora atu salva ai-laran tuan sira no fauna atu salva balada fuik sira”, sujere.

Lere mós husu ba MAP atubele asegura abitante sira ne’ebé ka’er kilat manu tanba fó ameasa ba fauna sira, Enkuantu presiza mós kria lei ida atu fó kastigu todan ka multa ba ema ne’ebé estraga floresta.

“Kuandu ita asegura flora no fauna mak iha sentidu ba kada tinan ita komemora loron nasionál ne’e iha kada 13 janeiru, se laiha mak sentidu mós laiha. Ita fó parabéns ema sira ne’ebé  iha vontade  atu konserva no asegura ita-nia floresta no balada sira iha Timor-Leste no ba susesu  tomak atu salva Ai-kameli no floresta iha Timor-Leste”, hakotu.

Entretantu, Ministru Agrikultura no Peska, Joaquim José Gusmão dos Reis Martins, dehan iha lei ne’ebé define tiha ona katak presiza duni proteje no asegura flora no fauna, maibé presiza konxiénsia sidadaun hotu-hotu nian atubele hadomi natureza.

“Ita tenta halo aproximasaun liuhusi edukasaun no sensibilizasaun atu ita-nia komunidade hadomi no asegura flora no fauna”, salienta.

Notísia relevante : Hamorin Identidade Timór, Governu iha Responsabilidade Konserva Ai-Kameli

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here