Diretór ezekutivu Fórum Organizasaun Naun Governamentál (FONGTIL), Daniel Santos do Carmo. Imajen TATOLI/Cipriano Colo

DILI, 13 janeiru 2020 (TATOLI)--Sosiedade Sivíl liuhusi Forum Organizasaun Naun Governamentál (FONGTIL) haree hetan razaun lima, inklui burokrasia ne’ebé sai kauza prinsipál hodi difikulta ezekusaun Orsamentu Jerál Estadu (OJE) 2019, to’o de’it pursentu 84.

Diretór Ezekutivu FONGTIL, Daniel Santos do Carmo esplika pontu lima ne’e mak hanesan, primeiru, tanba sistema transferénsia públika ka sistema orsamentu nian husi ministériu sira la’o neineik liu.

“Dalaruma, planu halo tiha, maibé osan atrazu, tanba ami mós iha esperiénsia ne’ebé haree hetan ida-ne’e. Ho ida-ne’e maka sosiedade sivíl konsidera katak sistema burokrasia ne’e ladún fasilita no fó apoiu másimu ba implementasaun programa sira iha terrenu, liuliu transferénsia orsamentu husi Ministériu Finansa ba banku atubele aloka ba terrenu”, nia hatutan.

Segundu, Daniel dehan, Governu laiha estratéjia implementasaun, katak, sira halo planu atu implementa programa, maibé la define estratéjia atu implementa oinsá.

“Entaun, dalaruma halo hela planu, maibé laiha mekanizmu atu halo aprosimasaun, to’o ikus la konsege implementa tanba fallansu iha koordenasaun entre liña ministeriál sira, entre Governu ho komunidade. Ezemplu, atu halo projetu ruma dalaruma fatin iha tiha maibé la konsulta ho komunidade ka benefisiáriu, liga ho kompensasaun no seluk tan”, nia argumenta.

Terseiru, nia informa, tanba Governu dalaruma halo planu asaun, maibé, problema rekursu atu implementa rekursu iha ministériu sira. Sosiedade sivíl konsidera ida-ne’e kabe ba kompeténsia koñesimentu ida-idak nian oinsá atu halo serbisu. Dalaruma ema ladún iha koñesimentu atu halo serbisu kona-ba ida-ne’e, entaun difísil ba nia atu organiza hodi ezekuta orsamentu iha ministériu ne’e rasik.

Daniel hateten katak, ida-ne’e buat tékniku liu, maibé iha prosesu administrasaun tenke konsidera.

“Iha Lian Ingléz dehan the right man on the right place (hatuur ema iha ninia fatin loloos), maibé dalaruma ita la konsidera asuntu ida-ne’e, no implika mós iha ezekusaun”, nia hateten tan.

Kuartu, maka mudansa ba kargu xefia sira. FONGTIL haree katak dalaruma ministru hakarak troka diretór jerál, troka diretór nasionál, troka xefe departamentu, ne’e mós implika ba implementasaun. Tanba, loos duni presiza troka, maibé diretór ida atu halo serbisu di’ak, presiza halo adaptasaun ho sistema, satán iha komunikasaun polítika ladún di’ak, nune’e diretór tuan ne’e dalaruma lakohi entrega dokumentu serbisu sira, entaun implika mós ba ezekusaun.

Kintu, maka inserteza polítika ne’ebé Timor-Leste enfrenta entre líder sira, lori mós implikasaun tama ba iha burokrasia. Daniel fó ezemplu katak Prezidente Repúblika la fó pose ba membru Governu sira, influensia husi podér informál hanesan asesór sira ho sira-nia responsabilidade sai problema. Ida-ne’e kontribui mós ba ezekusaun OJE 2019 ladún la’o di’ak.

Husi kauza hirak-ne’e, FONGTIL ne’ebé hanesan mós benefisiáriu ba OJE 2019 sujere ka propoin oinsá hadi’a ezekusaun. Primeiru maka iha era dijitalizasaun ne’e ezije katak atu asesu dokumentu ida uza minutu no labele uza loron, satán semana.

“Prosesu transferénsia ne’e uza loron ida no tarde liu loron rua. Tanba ne’e, ha’u sujere atu maximiza teknolojia ne’ebé iha atu apoiu serbisu ministériu ida-idak nian”, nia sujere.

Proposta segundu maka Daniel husu katak tenke hanoin oinsá iha termu polítika ne’e, bele iha diverjénsia, maibé tenke konsidera ida-ne’e iha leten liu.

“Husik burokrasia ne’e la’o ketak ida, mantein profisionalizmu nune’e labele lori polítika iha nível altu lori tama ba burokrasia. Nune’e, nomeasaun ba kargu xefia sira, di’akliu bazeia de’it ba lei funsaun públika katak to’o tinan tolu mandatu ramata mak troka atu sira bele hala’o serbisu ho másimu” nia sujere tan.

Antes ne’e, Ministra Finansa Interina, Sara Lobo Brites deklara ona katak ezekusaun Orsamentu Jerál Estadu foin atinje pursentu 84, no la konsege ezekuta pursentu 16.

Nia dehan, ezekusaun to’o de’it pursentu 84 tanba Prezidente Repúblika, Francisco Guterres Lú Olo promulga Orsamentu Jerál Estadu 2019 iha fulan fevereiru, no foin ezekuta iha marsu 2019.

Entretantu, planu ezekusaun OJE 2019 ho montante biliaun $1, 482, ezekuta ona biliaun $1,240-resin no falta millaun $200 maka la konsege ezekuta.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here