Sekretáriu Estadu Terras no Propriedades Mário Ximenes. Imajen/TATOLI

DILI, 13 janeiru 2020 (TATOLI)- Kontratu servisu Sistema Nasionál Kadastru (SNC-sigla Portugés) ne’ebé termina ona iha dezembru 2019 hodi kontinua prolonga ba loron 6 marsu 2020, halo traballadór  na’in 300-liu ameasa sei lakon servisu.

Notísia Relevante : SNC Rejista Ona Parsela Rihun 310

Sekretáriu Estadu Terras no Propriedade (SETP), Mário Ximenes,  rekoñese katak, traballadór sira ne’e lakon servisu, tanba Governu Timor-Leste liuhusi Ministériu Justisa, iha loron 6 marsu 2014  fó konfiansa ba SNC hodi servisu hamutuk ho Diresaun Nasionál Terras Propriedade (DNTP) hodi sukat no rejista parsela (rai pedasuk) iha área Timor-Leste ne’ebé rezultadu sei entrega ba Governu Timor-Leste.

Husi servisu ne’ebé SNC implementa hahú fó empregu ba Timor-oan 300 liu, nune’e bainhira servisu remata, traballadór sira ne’e mós tenke para servisu.

Mário esplika, traballadór sira ne’ebé lakon servisu la iha problema ho governu, tanba sira nia kontratu halo ho kompañia.

Nia hateten, governu rasik sei halo selesaun ba traballadór 300 hodi hili ema na’in 50 tama kategoria  servisu di’ak sei kontinua servisu ho governu hodi kontinua prosesu sukat rai.

“Ida ne’e problema entre traballadór ho kompañia, estadu tuir ninia kbiit sei hasa’e ema na’in 50 ne’ebé servisu iha SNC husi 300-ital traballadór ne’ebé SNC uza ita sei halo selesaun ba sira hodi mai servisu hodi garante kualidade sistema servisu ne’e. Agora sira seluk ne’e problema ho kompañia la’ós ho fali estadu. Tanba kompañia maka halo kontratu ho traballadór,” dehan Mário Ximenes ba Ajénsia TATOLI iha Kuartél Jerál  Polisia Nasional Timor-Leste (PNTL), Caicoli, Dili, foin lalais ne’e.

SNC nia programa kontratu ho estadu hahú 2014 termina loloos iha 31 dezembru 2019, maibé governu fó tempu iha 1 janeiru too 31 marsu 2020 halo retensaun hodi hadi’a administrasaun hotu no atividade hotu- hotu sei entrega ba Ministériu Justisa liu usi DNTP maka sei halo fila fali ninia kontinuasaun servisu.

Projetu SNC hanesan Sistema Kadastru Nasionál iha Timor-Leste, Konsórsiu ida ne’e forma husi Grupu Média Nasionál, Holding’s (GMN-H) hamutuk ho ARM-APRIZE, husi Portugál nu’udar Konsultór ba Jestaun Castro Nasionál.

Rezolusaun ne’ebé fó dalan atu harii hamutuk Konsórsiu SNC aprova iha reuniaun Konsellu Ministru loron 7 fulan Outubru 2013 no mós iha reuniaun daruak loron 20 Novembru 2019, katak termu atu asina hamutuk nu’udar konsórsiu aprova ona hodi harii “Kontratu Kadastru  Nasionál no Rejistu ba rai iha Timor-Leste.

Projetu SNC ne’e ho totál orsamentu Millaun $57 ho nesesidade atu hala’o no hasa’e Ministériu Justisa nian esforsu tomak hodi hatán ba dezafiu importante kona-ba regulariza rai liuhusi implementa ho regra ne’ebé loos, jestaun ne’ebé nakloke no protesaun hodi hatán ba titularidade riku soin nian.

Too notísia ne’e hatún, Ajénsia TATOLI tenta konfirma ho na’in ba Kompañia Konsórsiu SNC husi parte GMN Holding’s, Jorge Manuel de Araújo Serrano, maibé  seidauk  bele fó komentáriu tanba okupadu ho servisu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here