Prezidente Asosiasaun Institute of Education (IE), António Guterres. Imajen Tatoli/Evaristo Soares Martins

DILI, 13 janeiru 2020 (TATOLI)—Prezidente Asosiasaun Institute of Education (IE), António Guterres husu Governu tulun sentru formasaun ne’ebé harii hosi timoroan sira, nune’e bele kontribui ajuda Governu eleva rekursu umanu iha Timor-Leste.

“Hatudu ba públiku katak Timor mós bele iha rekrusu atu dezenvolve nia-an. Kuaze iha rai-laran %75 ema estranjeiru maka harii, timoroan sira mínimu. Tanba ne’e, ita husu ba Governu katak Governu tenke investe ba formasaun ne’ebé própria harii hosi timoroan sira”, nia informa ba Agência TATOLI, iha Mandarin, Dili, segunda ne’e.

Nia fó ezemplu, dalaruma timoroan atu buka fatin oferese formasaun ba joven sira difísil tebes, maibé ema estranjeiru lalais liu.

Nia subliña, presiza hadi’a bukrorasia tanba intensaun timoroan ne’ebé harii formasaun atu tulun joven sira kompete iha merkadu traballu.

Prezidente Asosiasaun IE ne’e mós hateten, iha lisensiamentu ba sentru formasaun sira tenke fó prioridade ba timoroan sira.

“Di’akliu ita investe para sira bele iha forsa atu hamriik. Se lae ema estranjeiru mai ho nia osan rasik, entaun ita duni la toman”, nia informa.

Nia dehan tan, Governu bele ajuda apoia de’it formadór sira iha sentru formasaun ne’ebé estabelese hosi timoroan sira no apoia materiál prátika sira.

Tuir nia, durante ne’e, funsionáriu públiku barak mai tuir formasaun kona-ba finansa no akuntabilidade iha rai-li’ur no loloos ne’e iha rai-laran bele hela.

“Problema maka Governu la investe didi’ak ba sentru formasaun sira ne’ebé harii hosi timoroan sira”, Prezidente Asosiasaun Institute Of Education ne’e argumenta.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here