Ministru Agrikultura no Peskas, Joaquim José Gusmão dos Reis Martins. Imajen/Egas Cristovão.

DILI, 13 janeiru 2020 (TATOLI) – Ministru Agrikultura no Peska, Joaquim José Gusmão dos Reis Martins, informa katak Governu liuhosi Komité Revizaun Orsamentu Polítika (KROP) hasai ona osan ne’ebé prevee atu sosa ró tolu.

Objetivu prevee osan ne’e, atu hola ró tolu hodi kontrola iha kosta súl liuliu atividade peska ilegál.

“Atu sosa ró tolu iha tinan 2020 ne’e, kompromisu foun ne’ebé Primeiru-Ministru hakarak para bele hola ró tolu foun, maibé iha redusaun orsamentu 2020 nian ne’ebé hadi’a filafali deside elimina tiha, ne’ebé labele sosa ró iha tinan ne’e”, Ministru Agrikultura no Peska dehan hafoin partisipa reuniaun Konsellu Ministru iha Salaun Ministériu Finansa, Aitarak-laran, ohin.

Governante ne’e dehan presiza komprende kapasidade orsamentál, no buka hakbesik an ba parseiru sira.

“Ita mós tenke komprende Governu nia kapasidade orsamentál, no ita buka fali hakbesik an ba parseiru sira bele ajuda mós ita iha parte kontrolu tasi ninian”, katak.

Ministru Joaquim hateten atu kombate peska ilegál presiza iha ró patrulla rasik hodi halo patrullamentu iha kosta súl.

“Tenke iha ró patrullamentu rasik hodi kontrola bá to’o tasi kosta súl tanba ita-nia tasi agora luan tan, más ita laiha ró. Ita iha ró patrullamentu duni hanesan iha Komponente Navál no Polísia Marítima, maibé ró ne’ebé sira iha labele kobre to’o tasi-mane no peska ilegál ne’ebé barak liu iha kosta súl”, dehan.

Maski difísil atu kombate, maibé MAP sempre halo monitorizasaun iha tasi no bele identifika ró sira ne’ebé halo atividade sein autorizasaun.

“Daudaun ne’e, ami forma hela Autoridade Marítima, Ministériu Defeza maka lidera. Esforsu ne’ebé ami halo ona maka iha peskadór sira iha kosteira ne’e, ami tau GPS no ami husu sira halo relatóriu kona-ba ró sira ne’ebé la identifikadu, maibé halo hela operasaun iha ita-nia tasi-laran, más ne’e relatóriu de’it, atu kombate ne’e seidauk bele”, afirma.

Agora, MAP seidauk kontrata fali ró foun hodi hakaer ikan iha kosta súl, tanba sei estuda didi’ak antes foti desizaun hafoin Governu suspende tiha atividade empreza Hong Long iha tasi-mane.

“To’o agora, ami simu pedidu barak hosi kompañia sira, seidauk deside tanba bazeia ba esperiénsia sira ne’ebé ita iha uluk ita tenke hadi’a, haree ba kompañia sira ne’ebé iha kapasidade duni, kompañia sira ne’ebé koopera di’ak ho ita hodi nune’e bele hasai fali lisensa foun, to’o agora seidauk iha, tanba sei haree didi’ak, se la kuidadu didi’ak maka bele akontese filafali”.

Orsamentu ne’ebé mak antes ne’e tau iha proposta orsamentu tuan 2020 hodi sosa ró tolu ne’e ho kada unidade nia folin millaun $3-resin.

Entretantu, Prezidente Repúblika (PR), Francisco Guterres Lú Olo, kontinua husu Governu atu tau-matan sériu ba asuntu peska ilegál iha tasi Timór.

Xefe Estadu dehan ameasa iha tasi kada tinan aumenta ho modelu oioin, hanesan peska ilegál, pirataria, transporta sasán perigozu sira, esplorasaun ilegál ba rekursu sira, tráfiku, terrorizmu no imigrasaun ilegál ne’ebé mós akontese iha nasaun seluk.

“Realidade iha Timor-Leste hatudu katak públiku ko’alia barak kona-ba peska ilegál ne’ebé akontese iha ita-nia tasi, ho dadus oioin. Tanba ne’e, ministériu relevante sira presiza tau atensaun as liután ba asuntu ida-ne’e”, Xefe Estadu alerta ba Oitavu Governu liuhusi diskursu iha komemorasaun aniversáriu Komponente Navál FALINTIL-Forsa Defeza Timor-Leste (F-FDTL) ba dala-18, iha baze Navál Hera, Dili, domingu ne’e (12/01).

Prezidente Repúblika afirma katak tasi nu’udár rekursu importante ida husi rai Timor-Leste nian, nu’udár mós objetivu estratéjiku ida ba Timor-Leste ida-ne’ebé bele fó benefísiu barak liután ba rai-ne’e, iha tinan hirak oinmai.

Notísia relevante : 2020, Governu Planeia Sosa Ró Peska Unidade Tolu

Peska Ilegál Komesa Redús Kompara ho Tinan Kotuk

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here