Prezidente Repúblika, Francisco Guterres Lú Olo. Imajen Tatoli/António Gonçalves

DILI, 13 janeiru 2020 (TATOLI)–Prezidente Repúblika (PR), Francisco Guterres Lú Olo, iha 13 dezembru 2019, ezerse ninia kompeténsia tuir artigu 85, a, c no artigu 88 númeru 4 no artigu 149 númeru 1, 2 no 3 husi Konstituisaun Repúblika, bainhira deside veta projetu Dekretu-Lei ne’ebé simu husi VIII Governu kona-ba Rejime Estadu fó apoiu diretu ba Órgaun Komunikasaun Sosiál sira.  

Tuir komunikadu ne’ebé TATOLI asesu husi Palásiu Prezidensiál, ohin, hateten Prezidente Repúblika veta projetu Dekretu-Lei ne’e tanba haree katak Governu hili de’it subvensaun públika nu’udár dalan ida atu apoia Órgaun Komunikasaun Sosiál sira no Asosiasaun Jornalista.

Prezidente Repúblika hanoin katak apoiu ho de’it ho subvensaun públika la favorese sustentabilidade ba Órgaun Komunikasaun Sosiál sira, maibé kria dependénsia husi Governu no ida-ne’e hamate kriatividade Órgaun Komunikasaun Sosiál sira-nian.

Tuir Xefe Estadu katak fó osan de’it bele hamosu risku kontrole husi Governu ba Órgaun Komunikasaun Sosiál, inkluindu ba privadu sira no nune’e, bele hamate liberdade espresaun no asaun husi mídia sira.

Tanba ne’e, nia dehan, Estadu presiza haree oinsá fó apoiu ba Órgaun Komunikasaun Sosiál ho sistema tomak ida, ne’ebé diversifikadu no kompletu, inklui fó formasaun, apoiu ba jestaun no meiu teknolójiku sira.

“Ida-ne’e mak Lei Komunikasaun Sosiál haruka halo atu kria sistema apoiu diversifikadu no kompletu liuhosi apoiu diretu no indiretu husi Estadu ba Órgaun Komunikasaun Sosiál sira”, Prezidente Repúblika esplika.

Nia hatutan projetu Dekretu-Lei ne’ebé VIII Governu haruka mai Prezidente Repúblika la regulamenta orientasaun husi Lei Komunikasaun Sosiál tanba haree dalan ida de’it: fó osan biar hateten katak tenke tuir kontratu no konkursu.

Ho subvensaun públika de’it,  Lú Olo haklaken, sei iha mós aumentu tinan-tinan iha dotasaun orsamentál ba Transferénsia Públika. Dalan ida-ne’e sei hatodan Orsamentu Jerál Estadu tinan-tinan, ne’ebé depende ba únika fonte reseita, Fundu Petrolíferu. Governu iha obrigasaun atu hatudu dalan seluk atu hamenus dependénsia husi Fundu Peterolíferu.

Prezidente Repúblika fiar katak bainhira Governu hatuur sistema kompletu ida hanesan lei Komunikasaun Sosiál haruka, Órgaun Komunikasaun Sosiál sira sei haburas sira-nia kondisaun atubele hamriik mesak loron ruma, iha tempu badak, ho kbiit rasik, hakarak rasik no neon rasik. Bainhira hamriik mesak ona, Órgaun Komunikasaun Sosiál no jornalista sira bele iha liberdade tomak atu ko’alia no hakerek tuir étika jornalista haruka no nune’e , kontribui ba hametin demokrasia iha rai-doben no eduka ema ho di’ak.

Projetu Dekretu-Lei ne’e rasik ko’alia kona-ba apoiu husi Estadu ba Órgaun Komunikasaun Sosiál. Maibé iha ninia konteúdu, Governu haluan definisaun Órgaun Komunikasaun Sosiál tanba hatama mós Asosiasaun Jornalista sira-nian. Asosiasaun Jornalista la’ós Órgaun Komunikasaun Sosiál. Ne’e hatudu katak Dekretu-Lei ne’e, mak promulga karik, boot liu fali Lei Komunikasaun Sosiál.

Veto husi Prezidente Repúblika ba projetu Dekretu-Lei ne’e la signifika katak Governu tenke hamate apoiu ne’ebé fó daudaun ba Órgaun Komunikasaun Sosiál sira.

Veto ne’e la’ós atu hamate inisiativa Governu nian atu halo regulamentasaun ba Órgaun Komunikasaun Sosiál sira.

Veto ne’e husu ba VIII Governu atu hadi’a no hamosu Dekretu-Lei ida-ne’ebé bele hatán loloos ba orientasaun husi Lei Komunikasaun Sosiál rasik.

Prezidente Repúblika hakarak ajuda Governu halo regulamentasaun ba lei ida-ne’ebé reflete no fó dalan ba polítika apoiu diretu no indiretu, kompletu no efetivu ba Órgaun Komunikasaun Sosiál sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here