Diretór DNTT Natalino do Rosário. Imajen/Natalino da Costa

DILI, 13 janeiru 2020 (TATOLI) – Diretór Nasionál Transporte Terrestre (DNTT), Natalino do Rosário, submete ona lejizlasaun ba kontrolu transporte públiku nian ba asesór jurídiku Ministériu Transporte no Komunikasaun (MTK), atu haree hodi fó paresér ba lei sira.

Draft ba lejizlasaun sira, ami haruka tiha ba ministériu, atu parte jurídiku ministériu nian haree”, Natalino dehan ba jornalista sira iha Balidi, ohin.

Konteúdu hosi ezbosu lejizlasaun ne’e ko’alia kona-ba taxa administrativu, lisensa ba transporte, inspesaun veíkulu sira, rejistu veíkulu sira-nian, xapa matríkula, lejizlasaun ba limitasaun transporte ne’ebé halo ona operasaun tinan 10-resin atu muda fali ba transporte privadu, enkuantu ezbosu ne’e atu halo revizaun no mós bele hamosu fali foun.

“Presiza duni halo lejizlasaun ba diploma sira ne’e, balun presiza halo foun tanba nesesáriu tebes, hirak ne’ebé laiha difísil ba DNTT atu halo kontrolu”, salienta.

Entretantu tinan ne’e, sei finaliza diploma ministeriál sira, maibé ministériu relevante tenke fó atensaun ba asuntu kontrolu transporte públiku nian.

Xefe Departamentu Rejistu Veíkulu Diresaun Nasionál Transporte no Terrestre (DNTT), Nelson Martins, hateten daudaun ne’e transporte antigu barak maka halo operasaun, tanba ne’e tempu ona atu halo lei hodi regulariza viatura tuan sira.

“Ami iha ona planu atu regula transporte tuan sira hodi bandu sira labele halo operasaun. Daudaun ami haree hela ho ami-nia asesór jurídiku atu haree ida ne’e. Ami bele iha inisiativa no planu, maibé hirak ne’e tenke fortifika mós husi Ministru Transporte no Komunikasaun”, nia dehan foin lalais ne’e.

Hodi hatutan kestaun ida ne’e sai ona preokupasaun ba DNTT no ministériu. “Tanba foin daudaun ministru mós preokupa hodi husu ba DNTT atu haree ba kestaun oinsá atu regula transporte sira ne’ebé tuan ona”, Xefe Departamentu Rejistu Veíkulu ne’e katak.

Se lei ne’e hetan aprovasaun, entaun DNTT sei servisu hamutuk ho PNTL hodi haree ba transporte antigu sira ne’e hodi labele halo atividade tan.

Bainhira halo nafatin maka nia suar bele provoka saúde ne’ebé ladi’ak ba ema seluk no poluisaun ka fó impaktu ba ambiente ne’ebé maka besik. Tanba ne’e maka presiza iha lei ne’e atubele proibe ona viatura antigu labele halo operasaun.

Notísia relevante : Seidauk Iha Regulamentu Atu Regula Viatura Tuan Ne’ebé Sei Halo Operasaun

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here