Deputada Bankada CNRT, Bendita Moniz Magno. Imajen Metro FM

DILI, 13 janeiru 2020 (TATOLI)—Parlamentu Nasionál (PN), simu ona karta substituisaun temporária ba Saudoza Deputada Albina Freitas Marçal. Karta hosi partidu CNRT indika Bendita Moniz Magno mak substitui temporária.

“Iha karta ne’e dehan atu substitui temporariamente saudoza Deputada Albina Freitas Marçal maka señora Bendita Moniz Magno. Iha karta ne’e sita sei substitui temporariamente, maibé hosi temporariamente la sita dehan to’o bainhira”, Vise-Prezidente Parlamentu Nasionál, Maria Angelina Lopez Sarmento, ko’alia asuntu ne’e hafoin simu karta hosi bankada CNRT,  iha Parlamentu Nasionál, segunda ne’e.

Vise-Prezidente PN ne’e subliña, Bendita Moniz Magno, substitui hodi hein substituisaun definitiva hosi CNRT.

Entretantu, Deputada Substitutivu, Bendita Moniz Magno, hateten iha lista CNRT nian iha feto na’in-tolu mak tutuir malu maka hanesan Cedelizia Faria dos Santos atuál Sekretária Jerál Parlamentu Nasionál nian no Brígida Correia (preokupadu ho estudu) inklui nia.

“Señora Cedelizia labele tanba tenke haree ba Parlamentu Nasionál. Kona-ba señora Brígida Correia ne’e la disponível ona atu asegura polítika CNRT nian iha Parlamentu, entaun emidiatamente ha’u tenke substitui tanba nia (saudoza Albina) feto”, Bendita afirma.

Nia parte substitui deputada Albina Marçal dezde saudoza ne’e sei moras kuaze fulan-lima nia laran.

“Agora nia iis kotu ona, hakarak ka lakohi ha’u tenke kontinua, tanba iha partidu ha’u mós hanesan Vise-Prezidente Komisaun Polítika Nasionál (CPN-sigla portugés). Ami hotu-hotu mós hola parte foti desizaun. Ha’u mós iha direitu atu foti desizaun sé maka bele mai no sé maka labele mai”, nia tenik.

Deputada Bendita informa katak se CNRT iha hanoin atu foti seluk, nia parte mós iha direitu atu foti desizaun, tanba asume kargu Vise-Prezidente CPN partidu CNRT nian.

Tuir nia, laiha ema ida iha CNRT atu boot liu Komisaunn Diretiva Nasionál (CDN-sigla portugés) no CPN.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here