Prezidente Repúblika, Francisco Guterres Lú Olo. Imajen Tatoli/António Gonçalves

DILI, 12 janeiru 2020 (TATOLI)–Prezidente Repúblika (PR), Francisco Guterres Lú Olo hateten Timor-Leste presiza estratéjia defeza marítima ida-ne’ebé la’o ho diplomasia no ko’alia ho ibun mamar no matenek, nu’udár dalan atu hasees-an no rezolve konflitu hodi hetan parseria estratéjiku, nune’e haburas kapasidade iha ámbitu seguransa kooperativa marítima nian.

Kontestu ida-ne’e, Xefe Estadu hakarak hateten katak presiza diplomasia ida di’ak hodi envolve nasaun viziñu sira hanesan Indonézia no Austrália, hodi serbisu hamutuk hanesan parseiru estratéjiku iha tasi, atubele responde ba dezafiu sira iha tasi Timor no rejiaun ne’ebé Timor-Leste hola parte ba.

“Ho nune’e, ha’u hakarak salienta dala ida tan importánsia atu harii modelu ida ba Sistema Nasionál Autoridade Marítima, tuir realidade no rekursu ne’ebé uitoan de’it, ne’ebé bele hetan beibeik kolaborasaun hosi entidade hotu-hotu no instituisaun sivíl sira, militár no polísia, públiku ka privadu ne’ebé bele kontribui hodi hametin ita-nia seguransa marítima”, Lú Olo hateten lia hirak-ne’e liuhusi diskursu komemorasaun Aniversáriu Komponente Navál FALINTIL Forsa Defeza Timor-Leste (F-FDTL) ba dala 18 (sanulu resin ualu), iha Baze Navál Hera, Dili, domingu ne’e.

PR Lú Olo hatutan, modelu ida-ne’ebé foka ba esplorasaun husi konseitu “duplu-uzu” iha operasaun seguransa tasi nian, hodi obriga Mariña atu iha mós kapasidade resposta iha área polísiamentu hodi hatuur lei no partisipa iha konflitu ne’ebé ho intensidade ki’ik.

Nia hatutan, Timor-Leste mós hola parte ona iha Programa Seguransa Marítima Pasífika nian ne’ebé promove hosi Governu Austrália, ho doasaun ró patrulla rua (2) ho tipu ró patrulla ho klase guardian, ne’ebé tuir planu sei to’o iha Dili iha tinan 2023.

“Timor-Leste iha prosesu hela atu envolve-an mós iha kooperasaun trilaterál entre Japaun, Indonézia no Timor-Leste, ne’ebé haree ba esperiénsia mesak nasaun illa de’it, ho hanoin ida de’it oinsá atu aprende, aproveita no asegura tasi. Timor-Leste iha ona fronteira-tasi definida ho Austrália, no iha prosesu hela atu define fronteira-tasi ho Indonézia. Timor-Leste ninia liña kosteira liu kilómetru atus hitu no iha Zona Ekonómika Eskluziva Marítima ho milla naútika atus rua. Faktu sira-ne’e obriga implikasun hosi meiu sira atu ezerse ita-nia juridiksaun iha tasi. Tanba ne’e, importante tebes Estadu investe iha rekursu umanu, infraestrutura no ekipamentu adekuadu hodi garante ita-nia soberania iha tasi”, nia subliña.

Aman nasaun ne’e fiar katak esforsu tomak ne’ebé halo ona, no sei kontinua halo, husi Estadu inklui apoiu husi nasaun belun sira,  Timor-Leste (TL) bele ona kumpre Planu Estrátejiku Dezenvolvimentu Nasional-PEDN 2011-2030, ne’ebé dehan katak to’o tinan 2030, Komponente Navál iha treinamentu ho infraestrutura di’ak hodi asegura no proteje soberania tasi no mós partisipa iha ezersísiu marítimu internasionál.

Maski iha difikuldade barak no lori tempu atu haburas Komponente Navál tuir dalan ne’ebé ema hotu hakarak, Prezidente Repúblika nu’udár Komandante Supremu fiar katak líder sira iha Komponente ne’e, sei haka’as-an no habarani-an liután nu’udar ‘’Mariñeiru Lafaek Timor-Leste nian’’.

Partisipa iha serimónia aniversáriu Komponente Navál ne’e, Xefe Estadu-Maiór Jenerál FALINTIL-Forsa Defeza Timor-Leste, Majór Jenerál Lere Anan Timur, Komandante Komponente Navál, Kapitaun Fragata João Silva, militár Sira no konvidadu Sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here